TRENDING:
कर्तव्यावर असतानाच 'सावली' हरपली
विदीप जाधव हे केवळ अंगरक्षक नव्हते, तर ते दादांच्या प्रत्येक प्रवासात, प्रत्येक संकटात त्यांच्या पाठीशी ढाल बनून उभे राहायचे. २८ जानेवारीच्या त्या काळरात्री नियतीने या निष्ठेवर घाला घातला. आज त्यांच्या घरी पोहोचल्यावर सुनेत्रा पवार यांनी विदीप यांच्या प्रतिमेस पुष्पहार अर्पण करून श्रद्धांजली वाहिली. विदीप यांच्या पश्चात असलेल्या त्यांच्या वृद्ध आई-वडिलांना आणि कुटुंबियांना धीर देताना सुनेत्रा वहिनींचेही डोळे पाणावले होते. "दादा गेले आणि त्यांच्यासोबत त्यांचा विश्वासू साथीदारही गेला, हे दुःख शब्दांच्या पलीकडे आहे," अशा भावना यावेळी व्यक्त करण्यात आल्या.
advertisement
भाड्याचे घर अन् मनाचा मोठेपणा
विदीप जाधव यांच्या निधनानंतर त्यांच्या साध्या राहणीमानाची सर्वत्र चर्चा होत आहे. राज्यस्तरावरील मोठ्या नेत्याचे अंगरक्षक असूनही ते विटावा येथील 'श्रीकृष्ण विहार'मध्ये एका साध्या भाड्याच्या घरात राहत होते. शेजाऱ्यांनी आणि मित्रांनी विदीप यांच्या आठवणींना उजाळा देताना सांगितले की, "विदीप अत्यंत मनमिळाऊ आणि शांत स्वभावाचे होते. कामाचा कितीही ताण असला तरी त्यांच्या चेहऱ्यावर नेहमी स्मितहास्य असायचे."
तरडगाववर शोककळा
आपल्या गावातील मुलगा राज्याच्या उपमुख्यमंत्र्यांचा रक्षक आहे, याचा तरडगावला सार्थ अभिमान होता. मात्र, आज त्याच मुलाच्या आठवणीने गावकरी गहिवरले आहेत. सुनेत्रा पवार यांनी जाधव कुटुंबियांच्या दुःखात सहभागी होत, शासन आणि पवार कुटुंब सदैव त्यांच्या पाठीशी खंबीरपणे उभे राहील, असा विश्वास दिला.