तुळजाभवानी मंदिरात प्रसाद म्हणून देण्यात येणारा बुंदी लाडू आता पुन्हा एकदा पूर्ववत वितरित होणार आहे. यासाठी 25 जुलै रोजीचा मुहूर्त साधला असून, श्रावण महिन्याच्या पहिल्या दिवसापासून भाविकांना सशुल्क लाडूचा प्रसाद देणार असल्याची माहिती मंदिर संस्थानने दिली. यापूर्वी तुळजाभवानीचा प्रसाद म्हणून बुंदी लाडू देण्यात येत होता. मात्र, कोरोनाचा प्रादुर्भाव सुरू झाल्यानंतर प्रसादाचे वितरण थांबवण्यात आले. हा प्रादुर्भाव संपल्यानंतरही प्रसाद बंदच होता.
advertisement
दरम्यान, काही महिन्यांपूर्वीच मंदिर प्रशासनाने यासंदर्भात निविदा मागवल्या होत्या. यात पुणे येथील मिठाई व्यापारी चितळे बंधूंना लाडू वितरणाचे हक्क देण्यात आले आहेत. 25 जुलै रोजी सकाळी अधिकृतरीत्या लाडू प्रसाद वितरणाचे उद्घाटन मित्र संस्थेचे उपाध्यक्ष आ. राणाजगजितसिंह पाटील, जिल्हाधिकारी तथा मंदिर संस्थानचे अध्यक्ष कीर्ती किरण पुजार यांच्या हस्ते होणार आहे.
50 ग्रॅमचा लाडू 30 रुपयांना
शुक्रवारपासून वितरित करण्यात येणाऱ्या प्रसादाचा लाडू हा शुद्ध तुपातील असणार आहे. त्याचे वजन 50 ग्रॅम इतके राहणार असून, त्यासाठी भाविकांना प्रतिलाडूला 30 रुपये मोजावे लागणार आहेत.