'या अल्लाह, या अल्लाह...'; चेंडू हवेत अन् वाटलं एका क्षणात सगळं संपलं, PAK खेळाडूला कशाची होती भीती

नेदरलँड्सच्या गोलंदाजांनी धावा दिल्याच नाही पण त्या बरोबर नियमीत अंतराने विकेट्स देखील घेतल्या. यामुळे मॅचमध्ये एक वेळ अशी आली होती की पाकिस्तानचा पराभव स्पष्टपणे दिसत होता. पाकिस्तानने 98 धावात फक्त 3 विकेट गमावल्या होत्या. पण नेदरलँड्सने त्यांची अवस्था ७ बाद 147 अशी केली. मॅच नेदरलँड्सच्या हातात होती. पाकिस्तानला 12 चेंडूत 29 धावा हव्या होत्या. अशात 19व्या ओव्हरमध्ये त्यांनी 1 महत्त्वाचा कॅच सोडला आणि तब्बल 24 धावा दिल्या. या एका ओव्हरने मॅच नेदरलँड्सच्या हातातून गेली.

advertisement

पाकिस्तानकडून फहीम अश्रफ विजयाचा हिरो ठरला. त्याने 11 चेंडूत नाबाद 29 धावा केल्या. ज्यात 3 षटकार आणि 2 चौकारांचा समावेश होता. मॅच झाल्यानंतर फहीमने अटीतटीच्या क्षणी मैदानावर काय घडले याबद्दल सांगिले. यावेळी फहीम जे काही बोलला आता त्याची चर्चा सुरू झाली आहे.

फहीम अश्रफ याने एका षटकात डच वेगवान गोलंदाजाची अक्षरशः धुलाई करत 24 धावा वसूल केल्या. मात्र याच षटकात एक क्षण असा आला, ज्याने सामना पूर्णपणे पलटू शकला असता. षटकाच्या दुसऱ्याच चेंडूवर फहीमचा उंच फटका हवेत गेला, पण लाँग ऑनवर मॅक्स ओ’डाऊडकडून झेल सुटला आणि फहीमला जीवदान मिळालं. या झेलमुळे नेदरलँड्सला सामन्यात परत येण्याची संधी होती, पण ती हुकली.

या अल्लाह, या अल्लाह

पोस्ट-मॅच शोमध्ये बोलताना फहीम म्हणाला, मागील एक वर्ष आम्ही साधारण एकसारखाच क्रिकेट खेळतोय. त्यामुळे संघात जी जबाबदारी दिली जाते, ती शांतपणे आणि शक्य तितक्या उत्तम पद्धतीने पार पाडण्यावर आमचा भर असतो. त्या क्षणी हृदयाची धडधड वेगळी होती, पण असा दबाव नवीन नव्हता. पहिल्यांदाच असं काही घडत होतं असंही नव्हतं. त्यामुळे मैदानात जाऊन आपल्याला जे जमतं, तेच करण्यावर लक्ष केंद्रित केलं.

फलंदाजी करताना पार्टनरसोबत चर्चा इतकीच होती की विकेट फुकट देऊ नये. एकावेळी एक षटक खेळायचं. एखाद-दोन चौकार मिळाले, तर आपण लक्ष्याच्या आणखी जवळ जाऊ. सुदैवाने आम्ही जे ठरवलं होतं, तेच घडलं.

तो पुढे म्हणाला, जेव्हा चेंडू हवेत जातो, तेव्हा फक्त एकच इच्छा असते की तो जमिनीवर पडावा. आमचा प्रयत्न नेहमी सामना लवकर संपवण्याचा असतो. पण अशा क्षणी सर्वात महत्त्वाचं असतं ते नर्व्ह्स कंट्रोलमध्ये ठेवणं.

झेल सुटला आणि जीव भांड्यात

झेल सुटल्याच्या क्षणाबद्दल बोलताना फहीमने मनमोकळेपणाने कबुली दिली, मी अशा परिस्थितीत अनेकदा खेळलो आहे. त्यामुळे हार्टबीट कंट्रोलमध्ये होती. मी स्वतःला फक्त एवढंच सांगत होतो; जे येतं, ते कर. पण चेंडू हवेत गेल्यावर प्रार्थना करत होतो, ‘या अल्लाह, कॅच ड्रॉप होऊ देत … या अल्लाह, कॅच ड्रॉप होऊ देत आणि सुदैवाने तसंच झालं'.

या जीवदानानंतर फहीमने संधीचा पूर्ण फायदा घेत सामना पाकिस्तानच्या बाजूने वळवला.