Mumbai Local : वंदे भारतसारखा आरामदायी प्रवास लोकलमध्ये, लवकर धावणार नवी ट्रेन; कधीपासून करता येणार प्रवास?

मुंबई उपनगरी रेल्वे प्रवास अधिक सुरक्षित, आरामदायी आणि जागतिक दर्जाचा करण्याच्या दिशेने मोठे पाऊल उचलले जात आहे. धावत्या लोकलमधून पडून होणाऱ्या अपघातांना आळा घालण्यासह प्रवाशांना गारेगार प्रवासाचा अनुभव देण्यासाठी मुंबई मार्गावर 'वंदे मेट्रो' प्रकारातील वातानुकूलित लोकल धावणार आहे. या प्रकल्पामुळे प्रवासी क्षमतेत वाढ होणार असून मुंबई लोकलचा चेहरामोहरा पूर्णपणे बदलणार आहे.

आवश्यकतेनुसार 12, 15 आणि 18 डब्यांच्या एसी लोकल तयार केल्या जाणार आहेत. मेक इन इंडिया उपक्रमाअंतर्गत राबवण्यात येणाऱ्या या प्रकल्पामुळे देशांतर्गत उत्पादनाला चालना मिळणार आहे. सर्व गाड्या सुरु झाल्यानंतर मुंबईकरांचा प्रवास अधिक सुरक्षित, जलद आणि आरामदायी होईलअसा विश्वास मुंबई रेल्वे विकास महामंडळाने व्यक्त केला आहे.

या एसी लोकल ताशी 130 किमी वेगाने धावू शकतील. एअर-स्प्रिंग सेकंडरी सस्पेन्शनमुळे धक्केमुक्त प्रवासाचा अनुभव मिळेल. यूएसबी चार्जिंग, इन्फोटेनमेंट सिस्टीम, प्रवासी माहिती प्रणाली आणि रिअल-टाइम रूट मॅप्स अशा आधुनिक सुविधा यात असतील. गादीयुक्त आसने, दिव्यांग व व्हीलचेअर वापरकर्त्यांसाठी स्वतंत्र जागा उपलब्ध करून देण्यात येणार आहे.