बाणेर-शिवाजीनगर गाठा सुसाट! दुमजली उड्डाणपूल लवकरच वाहतुकीसाठी खुला, मुहूर्त कधी?

मिळालेल्या माहितीनुसार,एकात्मिक दुमजली उड्डाणपुलाच्या बाणेरकडील रॅम्पचे काम अंतिम टप्प्यात आले असून हा रॅम्प या आठवड्याच्या शेवटी वाहतुकीसाठी खुला केला जाणार आहे. त्यामुळे बाणेरहून शिवाजीनगरकडे जाणाऱ्या वाहनांना मोठा फायदा होणार आहे. प्रवासाचा वेळ कमी होईल आणि इंधनाचीही बचत होणार आहे.

यापूर्वी औंध ते शिवाजीनगर मार्गिका ऑगस्ट 2025 मध्ये सुरू झाली होती. आता बाणेर रॅम्प सुरू झाल्यानंतर विद्यापीठ चौकातील सुमारे 50 टक्के वाहतूक ताण कमी होईल असा प्रशासनाचा अंदाज आहे.

मात्र पाषाणकडील रॅम्पसाठी नागरिकांना अजून दोन ते तीन महिने प्रतीक्षा करावी लागणार आहे. जलवाहिनी दुरुस्ती आणि इतर तांत्रिक अडचणींमुळे या भागातील कामाला उशीर झाला आहे. ही कामे लवकर पूर्ण करण्यासाठी प्रयत्न सुरू असल्याचे मुख्य अभियंता रिनाज पठाण यांनी सांगितले.