या मंदिरात भक्तांना नाही प्रवेश; पुजारीही डोळे आणि तोंड झाकून करतो पूजा! यामागचं कारण काय?

या मंदिराचे दरवाजे इतर मंदिरांप्रमाणे दररोज उघडत नाहीत. लाटू देवता मंदिराचे दरवाजे फक्त वैशाख महिन्यातील पौर्णिमेला उघडले जातात. या दिवशी दूरदूरून भक्त मंदिराच्या आवारात येतात आणि बाहेरूनच दर्शन घेऊन पुण्य कमावतात. हा दिवस परिसरातील लोकांसाठी एका उत्सवापेक्षा कमी नसतो.

चमोलीचे रहिवासी कैलाश वशिष्ठ सांगतात की, पौराणिक मान्यतेनुसार, लाटू देवता हे उत्तराखंडची पूजनीय देवी नंदाचे भाऊ आहेत. देवी नंदा (जी पार्वती मातेचं रूप मानली जाते) यांच्या लग्नावेळी, लाटू देवता त्यांना निरोप देण्यासाठी कैलास पर्वतावर गेले होते. प्रवासात त्यांना तहान लागली आणि त्यांनी एका झोपडीत ठेवलेल्या दोन घागरींमधून चुकून मद्य प्राशन केले. यानंतर ते संतप्त झाले आणि गोंधळ घालू लागले, यामुळे नंदा देवी क्रोधित झाल्या आणि त्यांनी त्यांना शाप देऊन वाण गावात बंदिस्त राहण्याचा आदेश दिला. नंतर लाटूंनी आपली चूक मान्य केली आणि पश्चाताप केला. यानंतर आईने त्यांना वचन दिलं की, त्यांची पूजा वाण गावात केली जाईल, पण या अटीवर की, त्यांना कुणीही थेट पाहू शकणार नाही.

लाटू देवता मंदिर हे फक्त एक धार्मिक स्थळ नाही, तर श्रद्धा, भक्ती आणि रहस्याचं एक अद्भुत मिश्रण आहे. फक्त स्थानिकच नव्हे, तर दूरदूरून येणारे भक्तही या अलौकिक परंपरेचे साक्षीदार होण्यासाठी येथे येतात. मंदिराभोवतीचं वातावरण खूप शांत, आध्यात्मिक आणि रोमांचक आहे. उत्तराखंडमधील अनेक मंदिरे त्यांच्या अनोख्या परंपरा आणि श्रद्धेसाठी ओळखली जातात, पण लाटू मंदिरासारखी रहस्यमय ठिकाणं खूप कमी आहेत.