TRENDING:
सलमान खान हा देशातील सर्वाधिक श्रीमंत सेलिब्रिटींपैकी एक आहे. असे असताना त्याचा फाटलेल्या बुटांचा हा व्हिडीओ सोशल मीडियावर येताच तो आगीसारखा व्हायरल झाला आहे. अशातच आपल्या आवडत्या सुपरस्टारने असे फाटलेले बूट्स का घातले आहेत, असा प्रश्न चाहत्यांना पडला आहे. काही ट्रोलर्सनी सलमानला या प्रकारावर ट्रोल करायलाही सुरुवात केली. मात्र, या फाटक्या बुटांमागचं सत्य जेव्हा समोर आलं, तेव्हा ट्रोल करणाऱ्यांचेही डोळे विस्फारले आहेत.
advertisement
सलमानच्या फाटक्या बुटांमागचं नेमकं प्रकरण काय?
या व्हायरल झालेल्या व्हिडिओमध्ये सलमान खान आपल्या गाडीतून उतरताना दिसतोय. यावेळी त्याने चेक शर्ट, डोळ्यावर काळा गॉगल आणि हातात महागडं घड्याळ असा डॅशिंग लूक केला होता, ज्यात सलमान नेहमीप्रमाणेच स्टायलिश वाटत होता. पण कॅमेरा जेव्हा त्याच्या पायांकडे वळला, तेव्हा सर्वांना धक्काच बसला. सलमानने घातलेले बूट जागोजागी फाटलेले आणि मळलेले दिसत होते. २९०० कोटींची संपत्ती असलेल्या अभिनेत्याचे असे शूज पाहून सोशल मीडियावर वेगवेगळे तर्क लढवले जात आहेत.
फाटलेले नाही, तर लाखांचे बूट
दरम्यान, सलमान खानच्या फाटलेल्या बूटांचं रहस्य आता सॉल्व्ह झालं आहे. त्याने घातलेले हे बूट्स प्रत्यक्षात एका आंतरराष्ट्रीय लक्झरी ब्रँडचे अत्यंत महागडे बूट असून या लूकला डिस्ट्रेस्ड लूक असं म्हणतात. जगभरातील श्रीमंत वर्गात सध्या कपडे आणि बूट जाणूनबुजून जुन्या आणि फाटलेल्या डिझाइनमध्ये बनवण्याची फॅशन ट्रेंडमध्ये आहे. त्यामध्ये आता सलमान खानही सहभागी झाला आहे. हे बूट दिसायला जरी भंगार वाटत असले, तरी त्यांची किंमत लाखो रुपयांच्या घरात आहे. सलमानने यापूर्वी 'टायगर ३' च्या प्रमोशनवेळीही अशाच प्रकारचे बूट घातले होते, तेव्हाही असाच गदारोळ माजला होता.