Ahilyanagar Accident: दोन दिवसांपूर्वी नवी कोरी अलिशान कार घेतली, देवदर्शनाला जाताना चौघांचा मृत्यू

कुटुंबियांच्या आनंदावर विरजण

श्रीरामपूर इथे चव्हाण कुटुंबीयांनी दोन दिवसांपूर्वीच मोठ्या उत्साहाने नवीन कार खरेदी केली होती. या नवीन कारमधून सहकुटुंब शिर्डीला साईबाबांच्या दर्शनासाठी ते घरून निघाले. घराबाहेर पडताना प्रत्येकाच्या चेहऱ्यावर आनंद होता. मात्र, बाभळेश्वर-श्रीरामपूर रस्त्यावर खंडाळ्याजवळ समोरून येणाऱ्या ट्रकने त्यांच्या कारला भीषण धडक दिली. हा अपघात इतका भयानक होता की, नव्या कोऱ्या कारचा अक्षरशः चुराडा झाला.

advertisement

कुटुंबावर दु:खाचा डोंगर

या भीषण धडकेत चव्हाण कुटुंबातील चार सदस्यांचा जागीच मृत्यू झाला. ज्या घरात दोन दिवसांपूर्वी नवीन गाडीच्या पूजेचे पेढे वाटले गेले होते, तिथे आता फक्त आक्रोश आणि शांतता उरली आहे.अपघाताची माहिती मिळताच परिसरातील नागरिकांनी मदतीसाठी धाव घेतली, काळाने आपला डाव साधला होता.

दोन चिमुकले गंभीर जखमी

या अपघातातील सर्वात हृदयद्रावक बाब म्हणजे कारमध्ये असलेली दोन लहान मुले आणि एक महिला गंभीर जखमी झाले आहेत. रक्ताच्या थारोळ्यात पडलेल्या या चिमुकल्यांना तातडीने रुग्णालयात दाखल करण्यात आले आहे. ज्या आई-वडिलांच्या कुशीत हे मुलं दर्शनाला निघाले होते, तीच आता त्यांच्यासोबत नाहीत, हे सत्य या लेकरांना कसे सांगायचे? या विचारानेच मदत करणाऱ्यांच्याही डोळ्यांत पाणी आलं.