Pune Crime: भोसरीत भरदिवसा 'फिल्मी' थरार! धाडसी नागरिकांनी चोरट्यांना पकडलं, पण त्यांनी पिस्तूल काढला अन्...धक्कादायक घटना

इंद्रायणीनगरमधील चैतन्य पार्क, साईदर्शन सोसायटीत राहणारे धर्मेंद्र झा यांच्या घरात सकाळी ८ च्या सुमारास चोरट्यांनी प्रवेश केला. दरवाजाचे लॅच तोडून त्यांनी घरातील ५५ हजार ५०० रुपयांची रोकड आणि चांदीची नाणी चोरली. चोरी करून पळून जात असताना सोसायटीतील सतर्क नागरिकांना त्यांचा संशय आला आणि त्यांनी चोरट्यांना अडवले.

पकडल्या जाण्याच्या भीतीने चोरट्यांनी शस्त्रांचा वापर केला. सागरसिंग ऊर्फ फंट्यास्टिक बावरी याने नागरिकांवर चाकूने हल्ला केला, ज्यात सचिन पिंगळे आणि ध्वजशेर शाही हे जखमी झाले. याचवेळी त्याच्या साथीदाराने चक्क पिस्तूल उपसले आणि गोळीबाराची भीती दाखवत दुचाकीवरून धूम ठोकली. मात्र, नागरिकांनी जिवाची पर्वा न करता सागरसिंगला पकडून ठेवले आणि चांगलाच चोप दिला.

पकडलेला सागरसिंग हा मूळचा जालन्याचा असून तो रेकॉर्डवरील सराईत गुन्हेगार आहे. त्याच्यावर जालना आणि नागपूरमध्ये घरफोडीचे १७ गुन्हे दाखल आहेत. पोलिसांनी त्याच्याकडून चोरीचा ऐवजी, चाकू, काडतूस आणि पिस्तूलचे मॅग्झिन जप्त केले आहे. धक्कादायक म्हणजे त्यांनी चोरीसाठी वापरलेली दुचाकीही विश्रांतवाडी परिसरातून चोरलेली होती.