TRENDING:
ही धक्कादायक घटना 21 फेब्रुवारी रोजी युसुफ वडगाव पोलीस ठाण्याच्या हद्दीत घडली होती. एका सोनाराने आपल्या दुचाकीवरून सोने विक्रीसाठी जुन्या दिघोळअंबा रोडने प्रवास सुरू केला असताना होळ ते दिघोळअंबा दरम्यान दोन मोटारसायकलवरून आलेल्या चार अज्ञात इसमांनी त्यांना अडवले. अचानकपणे सोनाराच्या डोळ्यात तिखट चटणी फेकून त्यांना अंधुक दिसू लागेल अशी परिस्थिती निर्माण करत आरोपींनी त्यांना मारहाण केली. त्यानंतर त्यांच्या जवळील सोन्याच्या दागिन्यांची पिशवी जबरदस्तीने हिसकावून घेत आरोपींनी घटनास्थळावरून पलायन केले.
advertisement
पोलिसांनी सापळा रचून आरोपींना अटक
या घटनेनंतर युसुफ वडगाव पोलीस ठाण्यात गुन्हा दाखल करण्यात आला. स्थानिक गुन्हे शाखेने तपास हाती घेत परिसरातील तब्बल 50 हून अधिक सीसीटीव्ही कॅमेऱ्यांचे फुटेज तपासले. तांत्रिक विश्लेषणाच्या मदतीने संशयितांची ओळख पटवण्यात आली. मिळालेल्या माहितीनुसार पोलिसांनी सापळा रचून आरोपींना अटक केली.
गुन्ह्यात वापरलेली वाहने जप्त
रोहित रणजित धिमिधिमे (अंबाजोगाई), अभिषेक अशोक घाटुळ (परळी), कानिफनाथ विलास बुरकर (अंबाजोगाई), यशोदीप कल्याण किसान (अंबाजोगाई), सुदाम मारुती सोनवणे (डिघोळअंबा) आणि वीरसिंग ऊर्फ रणजितसिंग टाक (अंबाजोगाई) अशी अटक करण्यात आलेल्या आरोपींची नावे आहेत. त्यांच्याकडून लुटलेले सोने तसेच गुन्ह्यात वापरलेली वाहने जप्त करण्यात आली आहेत.
नागरिकांना सतर्क राहण्याचे आवाहन
या यशस्वी कारवाईमुळे नागरिकांमध्ये समाधान व्यक्त होत असून, बीड पोलिसांच्या कार्यक्षमतेचे कौतुक होत आहे. पोलिसांनी नागरिकांना सतर्क राहण्याचे आवाहन केले असून, संशयास्पद हालचाली दिसल्यास तातडीने पोलिसांना कळवण्याचे आवाहन केले आहे.