फडणवीसांच्या निकटवर्तीय आमदाराची प्रकृती बिघडली, तातडीने रुग्णालयात दाखल; प्रकृतीबाबत आली अपडेट

रुग्णालयात दाखल होताच तज्ज्ञ डॉक्टरांच्या पथकाने त्यांची सखोल तपासणी केली. तपासणीत हृदयाशी संबंधित अडचण लक्षात आल्यानंतर तातडीने अँजिओग्राफी करण्यात आली. त्यामध्ये रक्तवाहिनीत अडथळा आढळून आल्याने डॉक्टरांनी त्वरित अँजिओप्लास्टी करण्याचा निर्णय घेतला. सुमारे काही तास चाललेल्या या प्रक्रियेनंतर आमदार जोरगेवार यांची प्रकृती स्थिर असल्याचे डॉक्टरांनी सांगितले आहे. सध्या त्यांना अतिदक्षता विभागात निरीक्षणाखाली ठेवण्यात आले असून प्रकृतीत सुधारणा होत असल्याची माहिती रुग्णालय प्रशासनाने दिली आहे.

advertisement

मुख्यमंत्री फडणवीसांचा फोन

आमदार जोरगेवार यांच्या प्रकृतीची माहिती घेत मुख्यमंत्री देवेंद्र फडणवीस यांनी दूरध्वनीद्वारे विचारपूस केली. त्यांनी डॉक्टरांशी चर्चा करून उपचारांबाबत माहिती घेतली. या घटनेची माहिती मिळताच जिल्हाधिकारी आणि पोलीस अधीक्षक यांनीही रुग्णालयात भेट देऊन आमदारांच्या प्रकृतीबाबत चौकशी केली.

भाजप पदाधिकारी, कार्यकर्त्यांची रुग्णालयाबाहेर मोठी गर्दी

दरम्यान, आमदार जोरगेवार यांच्या प्रकृतीची बातमी समजताच भाजप पदाधिकारी, कार्यकर्ते आणि समर्थकांनी मोठ्या संख्येने रुग्णालयात गर्दी केली. रुग्णालय परिसरात एकच गडबड उडाली होती. मात्र, रुग्णालयातील उपचारांमध्ये अडथळा येऊ नये, तसेच रुग्णांच्या सुरक्षिततेच्या दृष्टीने अनावश्यक गर्दी टाळावी, असे आवाहन कुटुंबीयांनी आणि रुग्णालय प्रशासनाने केले आहे.

लवकरात लवकर बरे होण्यासाठी प्रार्थना

चंद्रपूर मतदारसंघातील नागरिकांमध्ये आमदार जोरगेवार यांच्या प्रकृतीबाबत चिंता व्यक्त केली जात असून, त्यांच्या लवकरात लवकर बरे होण्यासाठी प्रार्थना केल्या जात आहेत. रुग्णालय प्रशासनाच्या माहितीनुसार, पुढील  24 ते  48  तास निरीक्षणाखाली ठेवण्यात येणार आहे.