Mumbai Local : प्रवाशांनो लक्ष द्या; मुंबई लोकलमध्ये मेट्रो पॅटर्न राबवणार; नेमका रेल्वेचा प्लॅन काय?

पश्चिम रेल्वेने उपनगरी लोकलमध्ये चढ-उतारावेळी होणारी गर्दी आणि गोंधळ कमी करण्यासाठी पश्चिम रेल्वेने नालासोपारा स्थानकावर नवीन उपक्रम सुरू केला आहे. प्रत्येक डब्याच्या दारासमोर फलाटावर रंगीत पट्टे आणि पायचिन्हे काढण्यात आली आहेत. प्रवाशांनी त्या चिन्हांवर रांगेत उभे राहून आधी उतरणाऱ्या प्रवाशांना मार्ग द्यावा आणि त्यानंतरच गाडीत चढावे असे आवाहन करण्यात आले आहे.

सकाळच्या गर्दीच्या वेळेत खास करुन (सकाळी 6 ते 11) नालासोपारा स्थानकावर मोठ्या प्रमाणात प्रवासी ये-जा करतात. त्यामुळे रेल्वे प्रशासनाने विशेष क्राउड मॅनेजमेंट मोहीम राबवली. या मोहिमेत आरपीएफ आणि एमएसएफचे एकूण 22 कर्मचारी सहभागी झाले होते. त्यामध्ये 12 आरपीएफ आणि 10 एमएसएफ जवानांचा समावेश होता.

ही योजना पुढील दोन महिने चाचणी म्हणून सुरू ठेवली जाणार आहे. हा प्रयोग यशस्वी ठरल्यास इतर गर्दीच्या स्थानकांवरही अशीच रंगीत मार्किंग आणि रांग पद्धती लागू केली जाईल अशी माहिती मुंबई विभागाचे विभागीय व्यवस्थापक पंकज सिंग यांनी दिली.