...अन् एका सेकंदात सगळं संपलं, नगरमध्ये दोघांचा जागीच मृत्यू, धडकी भरवणारा CCTV VIDEO

या भीषण अपघातात मृत्यू झालेले दोन्ही तरुण त्रिभुवनवाडी येथील रहिवासी असल्याची माहिती समोर आली आहे. हे दोन्ही तरुण आपल्या दुचाकीवरून करंजीच्या दिशेने जात होते. यावेळी समोरून येणाऱ्या एका भरधाव स्कॉर्पिओने त्यांच्या दुचाकीला जोरदार धडक दिली. ही धडक इतकी भीषण होती की, दुचाकीवरील दोन्ही तरुण रस्त्यावर फेकले गेले. गंभीर दुखापत झाल्यामुळे या दोघांचाही घटनास्थळीच मृत्यू झाला.

हा संपूर्ण अपघात अपूर्वा पेट्रोल पंपावरील सीसीटीव्ही (CCTV) कॅमेऱ्यात कैद झाला आहे. या घटनेचे धक्कादायक फुटेज आता समोर आले असून, त्यामध्ये अपघाताची भीषणता स्पष्टपणे दिसून येत आहे. या व्हिडीओत संबंधित दुचाकी एका कारला ओव्हरटेक करताना दिसत आहे. पण संबंधित कारचा वेग जास्त असल्याने ही दुचाकी कारला ओव्हरटेक करू शकली नाही. याच वेळी समोरून स्कॉर्पिओ आली आणि दोन्ही वाहनांची समोरासमोर धडक बसली. हा अपघात इतका भीषण होता की दुचाकीचा अक्षरशः चुराडा झाला.

अपघाताचा आवाज ऐकताच परिसरातील नागरिकांनी घटनास्थळी मोठी गर्दी केली. घटनेची माहिती मिळताच पाथर्डी पोलिसांनी तत्काळ घटनास्थळी धाव घेतली. पोलिसांनी घटनेचा पंचनामा करून दोन्ही मृतदेह शवविच्छेदनासाठी जवळच्या ग्रामीण रुग्णालयात पाठवले. या अपघातामुळे त्रिभुवनवाडी आणि करंजी परिसरात हळहळ व्यक्त केली जात आहे.