मैत्री असावी तर अशी! जगले एकत्र अन् जातानाही साथ सोडली नाही; पाथर्डी महामार्गावरील त्या अपघाताने अख्खं गाव रडलं

नियतीच्या मनात काय असतं, याचा नेम कोणालाच नसतो. लहानपणापासून एकत्र खेळले, एकत्र वाढले आणि ज्यांची मैत्री संपूर्ण गावात चर्चेचा विषय होती, त्या दोन जिवाभावाच्या मित्रांचा प्रवास एका वळणावर कायमचा थांबला. त्यांच्या मैत्रीला कुणाचीतरी नजर लागली आणि सारं काही एका क्षणात संपलं. अहिल्यानगर-पाथर्डी महामार्गावर करंजीजवळ बुधवारी दुपारी झालेल्या एका भीषण अपघातात दोन तरुणांचा जागीच मृत्यू झाला. सोमनाथ पालवे आणि किरण कारखेले अशी या दोघांची नावं आहेत. या घटनेमुळे त्रिभुवनवाडी गावावर शोककळा पसरली असून हळहळ व्यक्त होत आहे.