TRENDING:
सहलीचा आनंद विरला; ओतूरजवळ बसचा अपघात
मिळालेल्या माहितीनुसार, अहिल्यानगर जिल्ह्यातून ५३ विद्यार्थी शिवनेरी किल्ल्याच्या सहलीसाठी निघाले होते. छत्रपती शिवाजी महाराज यांचे जन्मस्थान असलेल्या शिवनेरीचे दर्शन घेऊन हे विद्यार्थी अष्टविनायक दर्शनासाठी जुन्नर तालुक्यात जाणार होते. मात्र, ओतूर शिवारात महामार्गावर चालकाचा बसवरील ताबा अचानक सुटला आणि भरधाव बस डिव्हायडरला जाऊन धडकली.
१० ते १५ विद्यार्थी जखमी
advertisement
हा अपघात इतका भीषण होता की बसमधील १० ते १५ विद्यार्थी जखमी झाले. सुदैवाने, या अपघातात कोणतीही जीवितहानी झाल्याचे वृत्त नाही. घटनेची माहिती मिळताच स्थानिक नागरिकांनी आणि पोलिसांनी तातडीने मदतीसाठी धाव घेतली. जखमी विद्यार्थ्यांना तातडीने ओतूरमधील खासगी आणि सरकारी रुग्णालयात दाखल करण्यात आले आहे.
५३ विद्यार्थ्यांचा जीव टांगणीला
बसमध्ये एकूण ५३ विद्यार्थी प्रवास करत होते. सहलीच्या उत्साहात असलेल्या या विद्यार्थ्यांच्या बसला अचानक अपघात झाल्याने पालकांमध्ये चिंतेचे वातावरण निर्माण झाले आहे. पोलिसांकडून बस चालकाची चौकशी केली जात असून, बसमध्ये काही तांत्रिक बिघाड होता की चालकाचा निष्काळजीपणा, याचा तपास ओतूर पोलीस करत आहेत.