उन्हाळी सुट्टीत होऊदे दिल्ली दौरा, नांदेड-संभाजीनगरातून थेट ट्रेन, पाहा थांबे अन् वेळापत्रक

दक्षिण मध्य रेल्वेने उन्हाळी हंगामातील गर्दीच्या पार्श्वभूमीवर 29 विशेष गाड्या चालवण्याचा निर्णय घेतला आहे. मात्र, यामध्ये छत्रपती संभाजीनगरहून गाडी नसल्याने नाराजी व्यक्त होत होती. आता मराठवाड्यातील प्रवाशांची निकड लक्षात घेऊन नवी गाडी चालवण्याचा निर्णय घेतला आहे. विशेष म्हणजे सचखंड, संपर्क क्रांती आणि नांदेड- फिरोजपूर एक्स्प्रेसनंतर दिल्लीला जाण्यासाठी ही चौथी रेल्वे असणार आहे.

advertisement

Local Train : लोकलच्या दारात उभं राहणं निष्काळजी? हायकोर्टाचा महत्त्वाचा निर्णय

अशी धावणार विशेष रेल्वे

नांदेड ते दिल्ली (क्रमांक 07621) ही साप्ताहिक विशेष रेल्वे 11 एप्रिल ते 30 मे या कालावधीत दर शनिवारी धावेल. ही गाडी नांदेड येथून सकाळी 8.45 वाजता सुटेल. 11 वाजून 40 मिनिटांनी छत्रपती संभाजीनगरमध्ये येईल आणि 10 मिनिटांनी पुन्हा प्रस्थान करेल. दुसऱ्या दिवशी दुपारी 2.00 वाजता हजरत निजामुद्दीन येथे पोहोचेल. या गाडीच्या 11, 18, 25 एप्रिल आणि 2, 9, 16, 23 व 30 मे रोजी एकूण 8 फेऱ्या चालवण्यात येतील.

दिल्ली ते नांदेड (क्रमांक 07622) ही गाडी परतीच्या प्रवासात 12 एप्रिल ते 31 मे या कालावधीत दर रविवारी धावेल. दिल्ली येथून रात्री 9.40 वाजता सुटेल. तर दुसऱ्या दिवशी रात्री साडेआठ वाजता छ. संभाजीनगर आणि मध्यरात्री 12.35 वाजता नांदेडला पोहोचेल. या गाडीच्या देखील 12, 19, 26 एप्रिल आणि 3, 10, 17, 24 आणि 31 मे रोजी 8 फेऱ्या चालवण्यात येतील.

आरक्षण आणि थांबे

या विशेष साप्ताहिक गाडीचे आरक्षण 5 एप्रिल रोजी सकाळी 8 वाजता सुरू होईल. तसेच ही गाडी दोन्ही दिशांनी प्रवास करताना पूर्णा, परभणी, सेलू, परतूर, जालना, छत्रपती संभाजीनगर, मनमाड, जळगाव, भुसावळ, खंडवा, इटारसी, भोपाळ, बीना, झाशी, ग्वाल्हेर, आग्रा कँट आणि मथुरा या स्थानकांवर थांबेल.