Devendra Fadnavis Cabinet : कोणी मुलगी, कोणी पुतण्या.. महायुतीच्या मंत्रिमंडळावर उमटला घराणेशाहीचा ठसा

भाजपकडून सातत्याने काँग्रेस आणि इतर विरोधी पक्षांमधील घराणेशाहीवर जोरदार टीका करण्यात येते. आता, मात्र भाजपच्या नेतृत्त्वात असणाऱ्या सरकारमध्येही घराणेशाही दिसून येत आहे. मंत्रिमंडळातील मंत्र्यांचे वडील, काका हे राजकारणातील दिग्गज व्यक्तीमत्त्व राहिले आहेत. त्यांच्यानंतर त्यांचा राजकीय वारसा त्यांची मुले पुढे घेऊन जात आहेत. विशेष म्हणजे पंतप्रधान नरेंद्र मोदींनी संसदेत काँग्रेसवर हल्लाबोल करताना घराणेशाही मोडून काढण्याचा निर्धार नव्हे संकल्प केला होता.

advertisement

महायुती सरकारमध्ये घराणेशाहीची छाप

राष्ट्रवादी काँग्रेसचे ज्येष्ठ नेते मनोहर नाईक यांचे चिरंजीव आणि माजी मुख्यमंत्री सुधाकरराव नाईक यांचे पुतणे इंद्रनील नाईक यांचाही मंत्रिमंडळात समावेश करण्यात आला आहे. माजी आमदार रामप्रसाद बोर्डीकर यांची कन्या मेघना बोर्डिकर यांचीदेखील मंत्रिमंडळात वर्णी लागली. भाजपच्या सुरुवातीच्या काळातील ज्येष्ठ नेते दिवगंत नेते पांडुरंग फुंडकर यांचे पुत्र आकाश फुंडकर यांनीदेखील मंत्रिपदाची शपथ घेतली. तर, शिवसेना शिंदे गटाचे नेते रामदास कदम यांचा मुलगा योगेश कदम यांनीदेखील शपथ घेतली. शिवसेना-काँग्रेस असा राजकीय प्रवास केलेले भाजपचे ज्येष्ठ नेते, माजी केंद्रीय मंत्री नारायण राणे यांचा मुलगा नितेश राणे यांनाही मंत्रिमंडळात संधी मिळाली.

त्याशिवाय अभयसिंहराजे यांचे पुत्र शिवेंद्रसिंह, शिवाजीराव देसाई यांचे पुत्र शंभूराजे देसाई, मोरेश्वर सावे यांचे पुत्र अतुल सावे, बाळासाहेब विखे-पाटील यांचे पुत्र राधाकृष्ण विखे-पाटील यांनीदेखील मंत्रिपदाची शपथ घेतली. जनसंघाचे दिवगंत नेते गंगाधर फडणवीस यांचे पुत्र आणि माजी मंत्री शोभाताई फडणवीस यांचे पुतणे देवेंद्र फडणवीस हे राज्याचे मुख्यमंत्री आहे. तर, उपमुख्यमंत्री अजित पवार हे ज्येष्ठ नेते शरद पवार यांचे पुतणे आहेत. भाजपचे दिवंगत नेते गोपीनाथ मुंडे यांची कन्या पंकजा मुंडे-पालवे आणि पुतण्या धनंजय मुंडे यांनीदेखील मंत्रिपदाची शपथ घेतली.

CM फडणवीसांच्या मंत्रिमंडळात कुणाला संधी?