TRENDING:
जालना जिल्ह्यात वाळू माफियांची दहशत पुन्हा एकदा समोर आलीय. अंबड तालुक्यातील शहागड परिसरात सकाळी सातच्या सुमारास ही घटना घडली आहे. अवैध वाळू उत्खननावर कारवाईसाठी गेलेल्या तहसीलदारांच्या अंगावर वाळूमाफियाकडुन थेट ट्रॅक्टर घालण्याचा प्रयत्न झाला आहे.
आरोपींचे दोन ट्रॅक्टर जप्त
अंबडचे तहसीलदार विजय चव्हाण यांना स्वतःचा जीव वाचविण्यासाठी चक्क हवेत गोळीबार करावा लागला आहे. तहसीलदार चव्हाण यांनी चार राऊंड फायर केले, त्यानंतर आरोपी घटना स्थळावरून फरार झाले. दरम्यान आरोपींचे दोन ट्रॅक्टर जप्त करण्यात आले असून, या प्रकरणी गोंदी पोलीस ठाण्यात चार अनोळखी आरोपीवर गुन्हा दाखल करण्यात आलाय...पोलिसांकडून या घटनेचा अधिक तपास सुरू आहे.
advertisement
महसूल आणि पोलिस प्रशासन हतबल
मागील काही दिवसांपासून वाळू उपसा करण्याचा मुद्दा चांगलाच ऐरणीवर आला आहे. काही ठिकाणी कारवाईसाठी गेलेल्या पथकावर हल्ला झाल्याच्या घटना देखील घडल्या आहेत. अनेक मंडल अधिकारी व तलाठ्यांवर गेल्या वर्षभरात अनेक जीवघेणे हल्ले झाले आहेत. वाळू माफियांच्या परस्पर टोळी युद्धात खून मारामाऱ्या होत आहेत. अनेक मंडल अधिकारी व तलाठ्यांनी जिल्हाधिकाऱ्यांकडे पिस्तूल परवाना देण्यासाठी अधिकृत अर्ज प्रस्ताव दाखल केले आहेत. वाळू चोरी त्यातून गुन्हेगारी सामाजिक तणाव यामुळे महसूल व पोलिस प्रशासन हतबल आहे.