TRENDING:
नेमकी घटना काय?
भुदरगड तालुक्यातील नाधवडे येथे शनिवारी दुपारी मतदानाची प्रक्रिया शांततेत सुरू होती. दुपारी साडेतीन वाजण्याच्या सुमारास शिवसेना (ठाकरे गट) ग्राहक सेनेचे जिल्हाप्रमुख जयवंत वायदंडे हे मतदानासाठी केंद्रात आले. त्यांनी मतदान केल्यानंतर अचानक ईव्हीएम मशीन उचलून जमिनीवर जोरात आपटले. मशिन फुटल्याने आणि गोंधळ झाल्याने मतदान प्रक्रियेत व्यत्यय आला.
'बॅलेट पेपर'साठी टोकाचे पाऊल
advertisement
निवडणुका ईव्हीएमऐवजी बॅलेट पेपरवर घेण्यात याव्यात, अशी जयवंत वायदंडे यांची मागणी होती. या मागणीसाठी त्यांनी शासन आणि निवडणूक आयोगाचा निषेध व्यक्त करण्यासाठी हे कृत्य केल्याचे सांगण्यात येत आहे. विशेष म्हणजे, वायदंडे यांनी यापूर्वीच सोशल मीडियावर निवडणूक प्रक्रियेविरोधात आक्षेपार्ह पोस्ट व्हायरल केल्या होत्या. ईव्हीएम फोडल्या प्रकरणी जयवंत वायदंडे यांच्यावर गुन्हा दाखल करण्याची प्रक्रिया रात्री उशिरापर्यंत सुरू होती.
पोलिसांची कारवाई आणि मतदान पुन्हा सुरू
ईव्हीएम फोडल्याची घटना घडताच केंद्रावरील पोलीस कर्मचारी आणि निवडणूक अधिकारी सतर्क झाले. पोलीस उपनिरीक्षक योगेश गोरे यांनी तत्काळ वायदंडे यांना ताब्यात घेतले. काही काळ तणावाचे वातावरण निर्माण झाले होते, मात्र पोलिसांनी परिस्थिती नियंत्रणात आणली. त्यानंतर निवडणूक विभागाने पर्यायी व्यवस्था करून मतदान प्रक्रिया पुन्हा सुरळीत सुरू केली.
निवडणुकीची आकडेवारी आणि निकाल
दरम्यान, कोल्हापूर जिल्हा परिषद आणि पंचायत समिती निवडणुकीत जिल्ह्यात एकूण ७४.३५ टक्के इतके भरघोस मतदान झाले आहे. राज्यातील जिल्हा परिषद आणि पंचायत समितीच्या निवडणुकीचा निकाल ९ फेब्रुवारी रोजी जाहीर करण्यात येणार आहे.