TRENDING:
शनिवारी दुपारी साडे बारा वाजण्याच्या सुमारास एलबीएस मेट्रोचा स्लॅब कोसळल्याची प्राथमिक माहिती आहे. जॉन्सन गार्डनच्या पुढील बसस्टॉपजवळ मेट्रोचा स्लॅब कोसळला. स्लॅबखाली काही लोक अडकल्याची माहिती आहे. तसेच काही लोक जखमी असल्याची शक्यता वर्तविण्यात येत आहे.
advertisement
घटनेची माहिती मिळाल्यानंतर अग्निशमन दलाचे जवान घटनास्थळी दाखल झाले आहेत. स्लॅब हटवून जखमींना जवळील खासगी रूग्णालयात दाखल करण्यात आले आहे. दरम्यान, जॉन्सन गार्डनजवळ सुमारे अर्ध्या तासाहून अधिक काळापासून प्रचंड वाहतूक कोंडी झाली आहे.
तीन जण गंभीर जखमी, एकाचा मृत्यू
चार जखमींपैकी एकाचा मृत्यू झाला आहे. रामधन यादव यांचा अपघातात दुर्दैवी मृत्यू झाला. राजकुमार यादव, महेंद्र यादव आणि दीपा रुहिया असे जखमी झालेल्या लोकांची नावे आहेत.
मुंबईच्या नवनिर्वाचित महापौर रितू तावडे तासाभरातच दुर्घटनास्थळी
कंत्राटदारांनी सर्व नियम पाळून काम करणे गरजेचे आहे. कारण विकास करताना मुंबईकरांची सुरक्षा सगळ्यात महत्त्वाची आहे, हे लक्षात घेतले पाहिजे, असे मुंबई शहराच्या नवनिर्वाचित महापौर रितू तावडे म्हणाल्या. दुर्घटना घडल्यानंतर तासाभरातच त्या दुर्घटनास्थळी पोहोचल्या. तिथे त्यांनी अधिकाऱ्यांकडून अपघाताबद्दल माहिती घेतली. तसेच रुग्णांना दाखल केलेल्या रुग्णालयात जाऊन त्यांच्या प्रकृतीविषयी माहिती घेतली.
स्लॅब कोसळला, एमएमआरडीएचे स्पष्टीकरण
आज दुपारी १२:१५ वाजता मुलुंड अग्निशमन केंद्राजवळील मेट्रो लाईन बांधकामाच्या पियर पी१९६ जवळ एक घटना घडली, जिथे पॅराफीटचा एक भाग उंचीवरून पडला आणि तो रस्त्यावरून जाणाऱ्या ऑटो रिक्षावर आदळला. दोन व्यक्ती जखमी झाल्या असून त्यांना ताबडतोब जवळच्या रुग्णालयात हलविण्यात आले. त्यांच्या प्रकृतीवर लक्ष ठेवले जात आहे आणि आवश्यक ती सर्व वैद्यकीय मदत पुरविली जात आहे. मेट्रो प्रकल्प पथक घटनास्थळी आहे आणि बीएमसी आणि आपत्ती व्यवस्थापन अधिकाऱ्यांशी जवळून समन्वय साधून मदत कार्य आणि घटनास्थळ सुरक्षित करण्याचे काम करत आहे.