TRENDING:
ही कार दुसऱ्या तिसऱ्या कुणाची नाही तर त्याच शाळेत शिकवणाऱ्या शिक्षकाची होती. नाशिकच्या इगतपुरी येथील लिटल ब्लॉसम शाळेच्या आवारात एका ६ वर्षीय विद्यार्थ्याला शिक्षकाच्या कारने चिरडल्याची धक्कादायक घटना समोर आली आहे. या घटनेमुळे पालकांमध्ये प्रचंड संताप व्यक्त केला जात असून शाळा व्यवस्थापनाने हे प्रकरण दाबण्याचा प्रयत्न केल्याचा गंभीर आरोपही होत आहे.
advertisement
बूट बांधण्यासाठी खाली वाकला अन्...
शाळा सुटण्याच्या वेळी पहिलीत शिकणारा हा चिमुकला शाळेच्या आवारात आपल्या बुटाची लेस बांधण्यासाठी खाली वाकला होता. याच वेळी शिक्षक यश कदम यांची कार तिथून जात होती. चिमुकला खाली वाकलेला असल्याने चालकाच्या लक्षात आले नाही आणि कारचे चाक थेट विद्यार्थ्याच्या अंगावरून गेले. या भीषण अपघातात विद्यार्थ्याच्या डोक्याला गंभीर दुखापत झाली असून त्याला ४ टाके पडले आहेत. सध्या त्याची प्रकृती स्थिर असल्याची माहिती डॉक्टरांनी दिली आहे.
प्रकरण दाबण्याचा प्रयत्न? शाळेवर गंभीर आरोप
या अपघातानंतर शाळा व्यवस्थापनाने संवेदनशून्य भूमिका घेतल्याचा आरोप तक्रारदारांनी केला आहे. "शाळेने सुरुवातीला अपघाताची चुकीची माहिती दिली. सीसीटीव्ही फुटेज दाखवण्यास टाळाटाळ केली आणि संपूर्ण प्रकरण दाबून टाकण्याचा प्रयत्न केला," असा दावा पालकांनी केला आहे. दरम्यान, या अपघाताचे अंगावर काटा आणणारे सीसीटीव्ही फुटेज आता समोर आले असून, त्यावरून चालकाचा निष्काळजीपणा स्पष्टपणे दिसत आहे.