TRENDING:
राज्यातील राजकीय वातावरण तापले असतानाच, अहिल्यानगर जिल्ह्यातील राहुरी विधानसभा पोटनिवडणुकीत अत्यंत नाट्यमय घडामोडी घडत आहेत. महाविकास आघाडीचे प्रबळ दावेदार मानले जाणारे माजी मंत्री प्राजक्ता तनपुरे अचानक 'नॉट रीचेबल' झाल्याने राजकीय वर्तुळात खळबळ उडाली आहे. विशेष म्हणजे, तनपुरे उमेदवारी अर्ज भरण्याच्या मनस्थितीत नसल्याची चर्चा जोर धरत असून, त्यांच्या जागी आता गोविंद मोकाटे यांचे नाव आघाडीवर आले आहे.
advertisement
महाविकास आघाडीत पेच?
राहुरी मतदारसंघातील पोटनिवडणुकीसाठी महाविकास आघाडी कोणाला रिंगणात उतरवणार, याबाबत गेल्या काही दिवसांपासून खल सुरू होता. प्राजक्ता तनपुरे यांची उमेदवारी निश्चित मानली जात होती. मात्र, ऐनवेळी तनपुरे हे राष्ट्रवादी काँग्रेस शरद पवार गटाच्या बड्या नेत्यांच्या संपर्कात नसल्याची माहिती समोर येत आहे. त्यांच्या या 'नॉट रीचेबल' भूमिकेमुळे आघाडीच्या गोटात चिंतेचे वातावरण पसरले असून, उमेदवारीबाबतचा संभ्रम अधिकच वाढला आहे.
मोकाटेंच्या नावाची चर्चा का?
प्राजक्ता तनपुरे जर रिंगणातून बाहेर पडले, तर ऐनवेळी पर्यायी उमेदवार म्हणून गोविंद मोकाटे यांचे नाव चर्चेत आले आहे. मोकाटे यांना उमेदवारी देऊन महाविकास आघाडी ही जागा लढवण्याच्या तयारीत असल्याचे बोलले जात आहे. मोकाटे यांच्या सक्रियतेमुळे राहुरीचे राजकीय समीकरण आता पूर्णपणे बदलण्याची शक्यता आहे.
प्राजक्ता तनपुरे यांनी अद्याप कोणतीही अधिकृत भूमिका जाहीर केलेली नाही. ते खरंच निवडणुकीतून माघार घेणार की ही त्यांची काही राजकीय रणनीती आहे, यावर तर्कवितर्क लढवले जात आहेत. तनपुरे यांच्या निर्णयावर राहुरी विधानसभेचे भवितव्य अवलंबून आहे.
प्राजक्त तनपुरे हे राष्ट्रवादी काँग्रेसकडून निवडणूक लढवताना २०१९ मध्ये भाजपच्या शिवाजी कर्डिले यांचा पराभव करून १, ९७, ३९२ मतांनी विजयी झाले होते.