Special Report: रोहित पवार यांच्या जीवावर कोण उठलंय? जीवाला कुणामुळं धोका?

शरद पवारांच्या राष्ट्रवादीचे नेते रोहित पवारांच्या जीवाला धोका असल्याचा दावा केला जात आहे. खरं तर खुद्द रोहित पवारांनी या विषयी सुतोवाच केलं होतं. माझ्या परिवाराला माझी भीती वाटते आहे. मोठ्या लोकांना अंगावर घेतोयस तर आम्हाला तुझी काळजी वाटतीये, अशी भीती कुटुंबियांनी व्यक्त केल्याचे रोहित पवार यांनी सांगितले.

रोहित अस्वस्थ, त्याच्या जीवाला धोका- सुप्रिया सुळे

advertisement

आता खासदार सुप्रिया सुळेंनीही त्याला दुजोरा दिला आहे. मला रोहितची काळजी वाटतीये. मुख्यमंत्र्यांनी रोहितला सुरक्षा पुरवावी, अशी मागणी सुप्रिया सुळे यांनी केली. अजित पवारांच्या विमान अपघाताविषयी उपस्थित केलेल्या प्रश्नांमुळे रोहित पवार टार्गेटवर आल्याचं बोललं जातंय. गेल्या काही दिवसांत रोहित पवारांनी पत्रकार परिषदेत विमान अपघाताविषयी काही गंभीर प्रश्न उपस्थित केले होते. त्यासाठी काही पुरावेही त्यांनी सादर केले होते. त्यामुळे अजित पवारांच्या विमान अपघाताविषयी अनेक तर्कवितर्क लावले जात आहेत.

डीजीसीएतील अधिकाऱ्यांपासून ते विमान कंपनीबाबत रोहित पवारांचे प्रश्न

डीजीसीएतील अधिकाऱ्यांपासून ते विमान कंपनीबाबत रोहित पवारांनी प्रश्न उपस्थित केलेत. ब्लॅक बॉक्स जळाल्याच्या दाव्यावरही त्यांनी संशय व्यक्त केलाय. भाजपशी संबंधित कुटुंब आणि VSR कंपनीचे मालक रोहित सिंग यांचे संबंधही रोहित पवारांनी अधोरेखित केले. मुख्य आरोपी रोहित सिंग सध्या अमेरिकेत असून दुबईतही त्यांचे कार्यालय आहे. देशात इतकं मोठा वादंग निर्माण झालेला असताना त्यांना परदेशात जाण्यास कोणी मदत केली, हा तपासातील महत्त्वाचा दुवा ठरू शकतो, असा मुद्दा रोहित पवारांनी उपस्थित केला.

विमान अपघाताच्या तपासा विषयीच्या गतीवरही रोहित पवारांनी सवाल उपस्थित केलाय. तसेच पायलटच्या भूमिकेवरही त्यांनी संशय व्यक्त केला आहे. रोहित पवारांनी हे प्रकरण लावून धरल्यामुळेचं ते टार्गेटवर आल्याचा दावा केला जात आहे.

रोहित पवार म्हणाले जीवाला धोका, सत्ताधारी म्हणाले...

सरकारकडे निवेदन द्यावे सरकार त्यांना सुरक्षा देईल, असे मिटकरी म्हणाले. तर त्यांच्यावर हल्ला होईल असं वाटत नाही. गृहमंत्रालयाकडून योग्य ती कारवाई होईल, असे भुजबळ म्हणाले.

त्याची एक समिती असते, जीवाला धोका असल्यास समिती मुख्यमंत्र्यांना अहवाल देते, असे शिरसाट म्हणाले.

VSR कंपनीची अनियमितता, ब्लॅक बॉक्सचा संशय आणि आयटी सेलकडून होणारं ट्रोलिंग यावर रोहित पवारांनी सविस्तर भाष्य केलंय. सध्या याप्रकरणाचा तपास एएआयबी आणि डीजीसीए कडून केला जातोय. या प्रकरणाची सीबीय चौकशीची शिफारस राज्य सरकारनं आधीच केलीय. मात्र, आता रोहित पवारांच्या सुरक्षेचा मुद्दा पुढे आल्यानं या प्रकरणाला राजकीय वळण लागण्याची शक्यता नाकारता येत नाही.