TRENDING:
महिना झाला तरी बाळाला सर्दी - खोकल्याचा त्रास होत होता. औषधोपचार केला तरी बाळाचा त्रास कमी होत नसल्याने पालकांनी दापोलीतील बालरोगतज्ज्ञांकडे धाव घेतली. तिथे डॉक्टरांनी एक्स-रे काढण्याचा सल्ला दिला असता, बाळाच्या घशात एक उघडी सेफ्टी पिन अडकल्याचे निदर्शनास आले. परिस्थितीचे गांभीर्य ओळखून डॉक्टरांनी बाळाला तातडीने वालावलकर रुग्णालयात नेण्यास सांगितले.
कशी काढली सेफ्टी पिन बाहेर?
advertisement
रुग्णालयात पोहोचताच कान-नाक-घसा विभागाच्या डॉ. सीजा यांनी प्राथमिक तपासणी केली. क्षणाचाही विलंब न लावता बाळावर शस्त्रक्रिया करण्याचा निर्णय घेतला. तपासणीदरम्यान असे लक्षात आले की, आधी घशात दिसणारी ही पिन आता अन्ननलिकेपर्यंत खाली सरकली होती. सर्वात मोठी भीती ही होती की, सेफ्टी पिन उघडी असल्यामुळे ती अन्ननलिकेला छिद्र पाडू शकत होती, जे बाळाच्या जिवासाठी अत्यंत घातक ठरू शकले असते. मात्र, तज्ज्ञ डॉ. राजीव यांनी 'ईसोफॅगोस्कोपी' (Esophagoscopy) या प्रक्रियेद्वारे अत्यंत कौशल्याने ती पिन बाहेर काढली. सात महिन्यांच्या लहान बाळाला भूल देणे हे सर्वात मोठे आव्हान होते, जे रुग्णालयाच्या भूलतज्ज्ञांनी यशस्वीरीत्या पेलले.
बाळाला मृत्यूच्या दाढेतून सुखरूप बाहेर काढले
शस्त्रक्रियेनंतर बाळाला रुग्णालयातील अद्ययावत बालरोग अतिदक्षता विभागात ठेवण्यात आले होते, जिथे त्याची रिकव्हरी जलद गतीने झाली. कान-नाक-घसा तज्ज्ञ, भूलतज्ज्ञ आणि बालरोगतज्ज्ञ यांच्या एकत्रित प्रयत्नांमुळे हा चमत्कार घडला आहे. अत्याधुनिक यंत्रसामग्री आणि तज्ज्ञ डॉक्टरांमुळे वालावलकर रुग्णालय कोकणातील रुग्णांसाठी खऱ्या अर्थाने वरदान ठरत आहे. अन्ननलिकेत अडकलेली उघडी सेफ्टी पिन अत्यंत गुंतागुंतीच्या शस्त्रक्रियेद्वारे बाहेर काढून डॉक्टरांनी या बाळाला मृत्यूच्या दाढेतून सुखरूप बाहेर काढले आहे.
लहान मुलांकडे विशेष लक्ष दिले पाहिजे
पालकांनी लहान मुलांकडे विशेष लक्ष दिले पाहिजे. स्प्रिंग्ज, नाणी, पिना किंवा लहान खेळण्यांचे भाग यासारख्या वस्तू त्यांच्यापासून दूर ठेवणे अत्यंत महत्वाचे आहे. चुकून असा काही प्रकार घडला तर ताबडतोब डॉक्टरांशी संपर्क साधावा.
हे ही वाचा :