Ashok Kharat : भोंदू खरातच्या 'मायाजालात' नाशिकची बडी महिला अधिकारी? SIT च्या तपासात खळबळजनक माहिती आली समोर

भोंदू अशोक खरात प्रकरणात आता एक अत्यंत धक्कादायक वळण समोर आले आहे. या प्रकरणाचा तपास करणाऱ्या विशेष तपास पथकाच्या (SIT) हाती महत्त्वपूर्ण पुरावे लागले आहेत. नाशिकमध्ये कार्यरत असलेली एक तत्कालीन महिला अधिकारी आता पोलिसांच्या रडारवर आली आहे. सूत्रांच्या माहितीनुसार, या महिला अधिकाऱ्याने खरातला प्रशासकीय पातळीवर मदत केली होती, ज्याचे धागेदोरे आता एसआयटीच्या हाती लागले आहेत.

advertisement

काय आहे नेमके प्रकरण?

अशोक खरात याने भोंदूगिरीच्या जोरावर अनेकांना गंडा घातल्याचे समोर आले होते. मात्र, त्याचा हा डोलारा केवळ अंधश्रद्धेवर नाही, तर प्रशासकीय आशीर्वादावर उभा होता, हे आता स्पष्ट होत आहे. नाशिकमध्ये पोस्टिंग असताना या संबंधित महिला अधिकाऱ्याने खरातला विविध कामांत मदत केली होती. धक्कादायक बाब म्हणजे, या मदतीच्या बदल्यात खरातने आपले राजकीय आणि प्रशासकीय नेटवर्क वापरून या महिला अधिकाऱ्याला तिच्या पसंतीची पोस्टिंग मिळवून दिल्याची चर्चा आहे.

आर्थिक व्यवहारांचे संशयास्पद जाळे

केवळ पोस्टिंगच नाही, तर खरात आणि या महिला अधिकाऱ्यामध्ये मोठ्या प्रमाणावर आर्थिक व्यवहार झाल्याची माहितीही समोर येत आहे. SIT कडून सध्या या व्यवहारांच्या कागदपत्रांची आणि बँक डिटेल्सची पडताळणी करत आहे. सरकारी पदाचा गैरवापर करून एका भोंदूला पाठबळ देणे आणि त्याबदल्यात वैयक्तिक फायदे करून घेणे, या गंभीर आरोपांमुळे प्रशासकीय वर्तुळात मोठी खळबळ उडाली आहे.

पुढील कारवाईकडे लक्ष

या प्रकरणात लवकरच संबंधित महिला अधिकाऱ्याची चौकशी होण्याची शक्यता आहे. खरातच्या माध्यमातून आणखी किती अधिकारी या रॅकेटमध्ये सामील आहेत, याचा शोध आता पोलीस घेत आहेत. या कारवाईमुळे नाशिकमधील बड्या लोकांचे धाबे दणाणले असून, SIT च्या पुढच्या पावलाकडे सर्वांचे लक्ष लागले आहे.