Solapur: सुरक्षारक्षकानं 17 व्या मजल्यावरून खाली आणलं, पण ‘त्या’ कारणानं सगळं संपलं, धक्कादायक माहिती समोर

गुरुवारी दुपारी पनाशच्या 17 व्या मजल्यावर एक व्यक्ती हात जोडून उभा राहिल्याचे काही लोकांना दिसून आले होते. तेव्हा ही व्यक्ती सोलापुरातील प्रसिद्ध उद्योजक सदारंगानी असल्याची कल्पना कुणालाही नव्हती. मात्र, उंच इमारतीच्या कोपऱ्यावर हालचाली दिसताच स्थानिकांनी सुरक्षा रक्षकाला माहिती दिली.

सुरक्षा रक्षकाने खाली आणलं पण..

सुरक्षा रक्षकाला याबाबत माहिती मिळताच त्याने प्रसंगावधान राखून 17 व्या मजल्यावर धाव घेतली. सदारंगानी यांना समजावत सुरक्षितपणे खाली आणले. परंतु, सदारंगानी यांनी “माझ्या गाडीची चावी वरच राहिली आहे, ती घेऊन येतो”, अशी बतावणी करून पुन्हा 17 वा मजला गाठला. तसेच सुरक्षारक्षकाला काही समजण्याच्या आतच थेट खाली उडी घेतली. अचानक घडलेल्या या घटनेने सर्वत्र खळबळ उडाली.

advertisement

17 व्या मजल्यावर गेले, हात जोडून डोळे मिटले अन्..., सोलापुराती प्रसिद्ध उद्योजकाचं टोकाचं पाऊल, काय घडलं?

दरम्यान, पनाश अपार्टमेंटच्या 17 व्या मजल्यावरून उडी मारल्याने सुनील यांचा जागीच मृत्यू झाला. ही घटना परिसरातील सीसीटीव्ही कॅमेरांत कैद झाली. त्यानंतर याचे फुटेज देखील सोशल मीडिडायतून व्हायरल होत आहे. घटनेचं गांभीर्य लक्षात घेऊन विजापूर नाका पोलीस ठाण्याचे वरिष्ठ पोलीस निरीक्षक दादासाहेब गायकवाड यांनी सहकाऱ्यांसह घटनास्थळी धाव घेतली आणि पुढील तपास सुरू केला.

गाडीच्या नंबर प्लेटवरून पटली ओळख

सुनील सदारंगानी हे दुपारच्या सायंकाळी चारचाकी वाहनाने घटनास्थळी आले होते. पनाश अपार्टमेंटच्या पार्किंगमध्ये गाडी लावून ते लिफ्टचा वापर न करता पायऱ्यांवरूनच वरच्या मजल्यांवर गेले होते. सुरुवातीला त्यांना कुणीही ओळखले नव्हते. मात्र, नंतर गाडीच्या नंबरप्लेटवरून पोलिसांना त्यांची ओळख पटली.

कोण होते सुनील सदारंगानी?

सुनील मोतीलाल सदारंगानी (वय 58) हे सोलापुरातील प्रसिद्ध मुलतानी बेकरीचे मालक आणि उद्योजक होते. सोलापुरातील प्रसिद्ध व्यक्तिमत्व असणारे राजकुमार राठी यांचे ते जावई होते. व्यवसाय आणि उद्योगामुळे त्यांचा सोलापुरातील नामवंत व्यक्तींशी दांडगा संपर्क होता. परंतु, गेल्या काही काळापूर्वी मुलतानी बेकरी बंद झाली होती. त्यानंतर ते पुण्यातील खराडी भागात स्थायिक झाले होते. गेल्या चार दिवसांपूर्वीच ते पत्नीसह सोलापुरात आले होते आणि त्यांचा पुन्हा सोलापुरातच स्थायिक होण्याचा मानस होता.

दरम्यान, निकवर्तीयांनी दिलेल्या माहितीनुसार गेल्या काही काळापासून ते आर्थिक अडचणींचा सामना करत होते. त्यामुळे त्यांना नैराश्याने ग्रासले होते. त्यांच्यावर मानसोपचार तज्ज्ञांकडून उपचार देखील सुरू होते.