TRENDING:
नेमकं प्रकरण काय?
कल्पना (नाव बदललं आहे) (२६) असं हत्या झालेल्या तरुणीचं नाव आहे. तर सतीश रमेश कश्यप आरोपी प्रियकराचं नाव आहे. पोलिसांनी दिलेल्या माहितीनुसार, कल्पना ही विवाहित होती. मात्र काही काळापासून आपल्या पतीपासून विभक्त राहत होती. याच दरम्यान तिची ओळख सतीश रमेश कश्यप याच्याशी झाली. दोघांमध्ये प्रेमसंबंध निर्माण झाले. सतीशने कल्पनाला उदरनिर्वाहासाठी पुणे येथे एका खासगी कंपनीत नोकरीही लावून दिली होती. मात्र, काही दिवसांनंतर कल्पनाचे पुण्यात दुसऱ्या एका व्यक्तीसोबत प्रेमसंबंध असल्याचा संशय सतीशला येऊ लागला. या संशयातून सतीशने कल्पनाचा काटा काढण्याचा कट रचला.
advertisement
असा रचला हत्येचा कट
सतीशने कल्पनाला पुण्यातून यवतमाळला बोलावून घेतले. त्यानंतर तिला गोड बोलून जोडमोहा परिसरातील निर्जन अशा तासलोट जंगलात नेले. त्या ठिकाणी सतीशने तिचा गळा आवळून निर्घृण खून केला. हत्येनंतर कल्पनाची ओळख पटू नये आणि पुरावा नष्ट व्हावा, या उद्देशाने सतीशने तिच्या अंगावर पेट्रोल ओतून तिला पेटवून दिले. धक्कादायक बाब म्हणजे, या संपूर्ण कृत्यात सतीशला त्याच्या अल्पवयीन भावानेही साथ दिली.
पोलिसांनी असा लावला छडा
तासलोट जंगलात अर्धवट जळालेला मृतदेह सापडल्यानंतर पोलिसांनी तातडीने तपासचक्र फिरवली. सुरुवातीला मृतदेहाची ओळख पटवणे पोलिसांसमोर मोठे आव्हान होते. मात्र, स्थानिक गुन्हे शाखेने तांत्रिक माहिती आणि परिसरातील सीसीटीव्ही फुटेजचे अतिशय बारकाईने निरीक्षण केले. यासाठी १९६ कॅमेरा फुटेज तपासले. ४० हजाराहून अधिक फोन कॉल्सचा तपास केला. तपासादरम्यान पोलिसांचा संशय सतीश कश्यपवर बळावला.
पोलिसांनी सतीशला ताब्यात घेऊन त्याची सखोल चौकशी केली. सुरुवातीला त्याने उडवाउडवीची उत्तरे दिली, मात्र पोलिसांनी पोलिसी खाक्या दाखवताच त्याने गुन्ह्याची कबुली दिली. पोलिसांनी सतीश कश्यपला अटक केली आहे. पोलीस घटनेचा सविस्तर तपास करत आहेत.