नोकरदारांसाठी खूशखबर! या तारखेपासून UPI मधून झटपट काढता येणार पैसे

तुमच्या हक्काच्या EPFO मधील पैसे काढण्यासाठी आता क्लेम फॉर्म भरून दिवसेंदिवस वाट पाहण्याची गरज उरणार नाही. कर्मचारी भविष्य निर्वाह निधी संघटनेनं आपल्या ८ कोटी सदस्यांसाठी 'EPFO 3.0' अॅपमध्ये हे महत्त्वाचं आणि नवीन अपग्रेड आणत आहे. या अंतर्गत एप्रिल २०२६ पर्यंत एक नवीन मोबाईल ॲप लाँच केलं जाईल, ज्याद्वारे सदस्य थेट UPI वापरून आपल्या खात्यातील पैसे काढू शकतात.

advertisement

पीएफ काढण्याची प्रक्रिया आता एखाद्या बँकेतून पैसे ट्रान्सफर करण्याइतकी सोपी होणार आहे. नव्या नियमांनुसार, सदस्य आपल्या युपीआय पिनचा वापर करून लिंक केलेल्या बँक खात्यात तात्काळ पैसे वळवू शकतील. आजारपण, लग्न, शिक्षण किंवा घराच्या कामासाठी लागणारा पैसा आता अवघ्या ३ दिवसांत विनासायास हाताशी येईल. विशेष म्हणजे, यासाठी कोणत्याही मानवी हस्तक्षेपाची गरज उरणार नाही.

कसं असेल व्यवहाराचं गणित?

युपीआयद्वारे पैसे काढताना एका व्यवहारासाठी २५,००० रुपयांची मर्यादा असण्याची शक्यता आहे. निवृत्तीनंतरची सुरक्षा जपण्यासाठी तुमच्या एकूण बॅलन्सपैकी किमान २५% हिस्सा 'लॉक' राहील, तर उर्वरित मोठा हिस्सा तुम्ही गरजेनुसार काढू शकाल. लांबच लांब क्लेम प्रोसेसऐवजी आता थेट डिजिटल सेटलमेंटवर भर दिला जाईल.

ट्रायल सुरू, तांत्रिक अडथळे दूर करणार

श्रम आणि रोजगार मंत्रालयाने सध्या १०० डमी खात्यांवर याची चाचणी सुरू केली आहे. सिस्टीममध्ये कोणतेही तांत्रिक दोष राहू नयेत, यासाठी सरकार खबरदारी घेत आहे. सध्या ईपीएफओ वर्षाला ५ कोटींहून अधिक क्लेम सेटल करते, नव्या ॲपमुळे हा भार कमी होऊन सेवा अधिक वेगवान होईल. नवे ॲप आल्यावरही सध्याचे 'युनिफाइड मेंबर पोर्टल' आणि 'उमंग ॲप' पूर्वीप्रमाणेच इतर सेवांसाठी सुरू राहतील. मात्र, झटपट पैसे काढण्यासाठी नवे युपीआय आधारित ॲप हे मुख्य साधन ठरेल.