गंगापूरच्या शेतकऱ्याचा नाद खुळा! युपी, बिहारचं मार्केट ओळखलं, या स्पेशल पिकाच्या शेतीतून करतोय लाखोंची कमाई

पारंपरिक पिकांऐवजी काहीतरी वेगळं करण्याचा निर्धार करत पवार यांनी बाजारपेठेचा सखोल अभ्यास केला. उत्तर प्रदेश आणि बिहारमध्ये मोठ्या प्रमाणावर खाल्ली जाणारी परवल भाजी स्थानिक बाजारात उपलब्ध नसल्याचं त्यांच्या लक्षात आलं. विशेषतः वाळूज एमआयडीसी परिसरात काम करणाऱ्या परप्रांतीय कामगारांमुळे या भाजीची कायमस्वरूपी मागणी असल्याचं त्यांनी ओळखलं. याच संधीचं सोनं करत त्यांनी परवल शेतीचा प्रयोग सुरू केला.

पाण्याची कमतरता हा मोठा अडथळा असतानाही त्यांनी हार मानली नाही. टँकरने पाणी आणून त्यांनी पिकांना पाणीपुरवठा केला आणि नियोजनबद्ध पद्धतीने शेती केली. सुरुवातीला त्यांनी केवळ दहा गुंठ्यांत परवल लागवड करून प्रयोग केला. गुजरातमधून २५० ग्रॅम बियाणे तब्बल १० हजार रुपयांना खरेदी करून त्यांनी जोखीम घेतली. मात्र, पहिल्याच हंगामात चांगले उत्पादन आणि बाजारात ५० ते ६० रुपये प्रतिकिलो असा दर मिळाल्याने त्यांचा आत्मविश्वास वाढला.

परवल शेतीचे आणखी एक वैशिष्ट्य म्हणजे सुरुवातीच्या वर्षात सुमारे ५० हजार रुपयांपर्यंत खर्च येतो, मात्र त्यानंतर पुढील दोन ते तीन वर्षे काढणीव्यतिरिक्त विशेष खर्च करावा लागत नाही. त्यामुळे या पिकातून शेतकऱ्यांना दीर्घकालीन फायदा मिळू शकतो.