प्रवासाचा प्लॅन बदला! पुणे-मुंबई एक्सप्रेसवेसह अहमदाबाद हायवेवर वाहनांच्या 4 ते 7 किमीपर्यंत रांगा; भर उन्हात प्रवाशांचे हाल

पुणे-मुंबई एक्सप्रेसवेवर प्रवासाचे नियोजन करणाऱ्या वाहनचालकांसाठी अत्यंत महत्त्वाची बातमी आहे. आडोशी बोगदा ते मिसिंग लिंक (खालापूर एंड) पर्यंत वाहनांच्या तब्बल ३ ते ४ किलोमीटर लांब रांगा लागल्या आहेत. या कोंडीचे नेमके कारण अद्याप अस्पष्ट असून, वाहने संथ गतीने पुढे सरकत आहेत. घाट विभागात वाहनांची संख्या वाढल्याने ही परिस्थिती निर्माण झाल्याचा अंदाज वर्तवण्यात येत आहे. महामार्ग पोलीस वाहतूक सुरळीत करण्यासाठी प्रयत्न करत आहेत.

दुसरीकडे, पालघर जिल्ह्यातील मुंबई-अहमदाबाद राष्ट्रीय महामार्गावरही परिस्थिती अत्यंत बिकट आहे. मनोर येथील हालोली ते वरई दरम्यान ६ ते ७ किलोमीटरच्या रांगा लागल्या आहेत. गुजरातहून मुंबईकडे जाणाऱ्या वाहिनीवर पहाटेपासूनच ही कोंडी झाल्याने प्रवासी ३ ते ४ तासांपासून अडकले आहेत. येथील उड्डाणपुलाचे काम रखडल्याने आणि वाहनांचा ओघ वाढल्याने प्रवाशांना या प्रचंड मनस्तापाला सामोरे जावे लागत आहे.