उन्हाळ्याची सुट्टी कधी लागणार? शाळेची पहिली घंटा कधी वाजणार, शिक्षण विभागाकडून वेळापत्रक जाहीर

1 मे रोजी निकाल लागल्यानंतर उन्हाळ्याची सुट्टी सुरू होईल. त्यानंतर जून महिन्यात पुन्हा शाळा सुरू होईल. उन्हाळ्याची सुट्टी या वेळी कमी मिळणार आहे. परीक्षांचा डोंगर पार पडल्यानंतर आता वेध लागलेत ते आंबा, सुट्टी आणि मामाच्या गावाचे! शिक्षण विभागाने उन्हाळी सुट्ट्यांचं अधिकृत वेळापत्रक जाहीर केलं असून, राज्यातील सर्व शाळांना २ मेपासून उन्हाळी सुट्टी सुरू होणार आहे. पण यंदाच्या सुट्ट्यांमध्ये एक मोठा ट्विस्ट आहे, जो विदर्भातील शाळा आणि पालकांसाठी महत्त्वाचा ठरणार आहे.

आत्तापर्यंतचा इतिहास पाहिला तर, विदर्भातील कडक उन्हाळा लक्षात घेता तिथल्या शाळा इतर महाराष्ट्राच्या तुलनेत आठवडाभर उशिरा सुरू व्हायच्या. मात्र, यंदा शिक्षण संचालनालयाने सुट्ट्यांच्या कालावधीत एकरूपता आणण्यासाठी मोठा निर्णय घेतला आहे. आता मुंबई-पुण्यासोबतच नागपूर-गडचिरोलीतील शाळाही १५ जूनलाच सुरू होणार आहेत. जर एखाद्या शाळेला स्थानिक सणांसाठी अधिक सुट्ट्या हव्या असतील, तर त्यांना उन्हाळी सुट्टीत कपात करावी लागेल.

शिक्षण विभागाने स्पष्ट केले आहे की, शाळांना उन्हाळी सुट्टी जरी २ मेपासून असली, तरी शिक्षकांना निकालाची कामे आणि पुढील वर्षाचे नियोजन पूर्ण करावे लागणार आहे. ज्या शाळांना उन्हाळ्याऐवजी इतर सणांना जास्त सुट्ट्या हव्या असतील, त्यांनी शिक्षण अधिकार्‍यांची परवानगी घेणे आवश्यक आहे. मात्र, कोणत्याही परिस्थितीत एकूण सुट्ट्या ७६ दिवसांपेक्षा जास्त असणार नाहीत, याची काळजी शाळांना घ्यावी लागणार आहे.