भारतीय बाजार नियामक प्राधिकरण असलेल्या सेबीने डिजिटल सोन्यात गुंतवणूक करणाऱ्या गुंतवणूकदारांना एक मोठा इशारा दिला आहे. अनेक ऑनलाइन प्लॅटफॉर्म अशा उत्पादनांची विक्री गुंतवणूकदारांना करत आहेत. या गुंतवणुकी सेबीच्या कोणत्याही चौकटीत येत नसल्याचे सेबीने म्हटले.
या प्लॅटफॉर्ममध्ये गुंतवणूक करणाऱ्या गुंतवणूकदारांना कोणतीही सुरक्षा किंवा गुंतवणूक संरक्षण मिळणार नसल्याचे सेबीने म्हटले.
सोन्यातील गुंतवणूकीत गमवावे लागतील पैसे...
advertisement
सेबीने त्यांच्या निवेदनात म्हटले आहे की काही डिजिटल किंवा ऑनलाइन प्लॅटफॉर्म 'डिजिटल गोल्ड' किंवा 'ई-गोल्ड' उत्पादनांच्या स्वरूपात गुंतवणूक संधी देत आहेत, परंतु ही उत्पादने सिक्युरिटीज किंवा कमोडिटी डेरिव्हेटिव्ह्ज नाहीत. म्हणून, सेबीचे त्यांच्यावर कोणतेही नियंत्रण नाही. अशा उत्पादनांमुळे गुंतवणूकदारांना प्रतिपक्ष आणि ऑपरेशनल जोखीम येऊ शकतात.
वेगवेगळ्या कंपन्यांकडून डिजीटल गोल्डची विक्री...
सध्या, तनिष्क, एमएमटीसी पीएएमपी, आदित्य बिर्ला कॅपिटल, कॅरेटलेन, जोस अलुक्कास, फोनपे आणि श्रीराम फायनान्स सारख्या अनेक प्रसिद्ध कंपन्या डिजिटल सोने विकत आहेत. एक सोपा आणि सोयीस्कर गुंतवणूक पर्याय म्हणून त्याचा प्रचार करण्यात येत आहे.
गुंतवणूकदारांना कोणतेही संरक्षण नसणार...
सेबीने म्हटले की, कोणतेही ब्रँड कितीही विश्वासार्ह असले तरी, डिफॉल्ट झाल्यास गुंतवणूकदारांना कोणतेही संरक्षण मिळणार नाही. या गुंतवणुकीवर सेबीचे नियंत्रण नाही. सेबीने गुंतवणूकदारांना फक्त नियंत्रित सोन्याच्या उत्पादनांमध्ये गुंतवणूक करण्याचा सल्ला दिला आहे. यामध्ये गोल्ड ईटीएफ, इलेक्ट्रॉनिक गोल्ड रिसीट्स (ईजीआर) आणि एक्सचेंज-ट्रेडेड कमोडिटी कॉन्ट्रॅक्ट अशा पर्यायांमध्ये गुंतवणूक करता येईल, असे सेबीने म्हटले आहे.
गुंतवणूकदार धास्तावले...
सेबीच्या या इशाऱ्यामुळे डिजिटल सोन्याच्या गुंतवणुकीच्या वाढत्या ट्रेंडबद्दल प्रश्न उपस्थित झाले आहेत. काही डिजीटल प्लॅटफॉर्म लोकांना कमी रकमेसह गुंतवणूक करण्याची संधी देत आहेत. मात्र, यातून आर्थिक जोखीमही निर्माण करू शकतात, असे सेबीने म्हटले.