सोमवारी देखील सोन्याच्या दरात मोठी घसरण झाली आहे. सोमवारी सोन्याच्या किमती जवळजवळ तीन आठवड्यांच्या नीचांकी पातळीवर पोहोचल्या. मजबूत होत असलेला डॉलर आणि अमेरिकन फेडरल रिझर्व्हच्या कठोर भूमिकेमुळे सोन्यावर दबाव निर्माण झाला आहे. देशांतर्गत सराफा बाजारात सोन्याच्या किमती प्रति १० ग्रॅम १.३२ लाख रुपयांवरून प्रति १० ग्रॅम १.२० लाख रुपयांपर्यंत घसरल्या आहेत. किंमत ११,००० रुपयांपेक्षा जास्त घसरली आहे, ती प्रति १० ग्रॅम १,२०,८९४ रुपयांवर पोहोचली आहे (डिसेंबरमध्ये एमसीएक्स गोल्ड). आता प्रश्न असा आहे की, सोने खरेदी करण्याची ही योग्य वेळ आहे का? या प्रश्नावर एक्सपर्टने भाष्य केले आहे.
advertisement
सोन्याच्या दरात घसरण का?
या आठवड्यात सोन्याच्या किमती कमकुवत झाल्या आहेत. आंतरराष्ट्रीय बाजारात डॉलर मजबूत होत असल्याने आणि फेडरल रिझर्व्हच्या कडक धोरणांमुळे सोन्याच्या दरात घसरण होत असल्याचे सांगण्यात येत आहे.
अमेरिकन मध्यवर्ती बँक, फेडरल रिझर्व्हने डिसेंबरमध्ये व्याजदर कपातीची कोणतीही हमी नसल्याचे म्हटले आहे. याचा अर्थ स्वस्त कर्जे आणि परवडणारी तरलता मिळण्याची आशा सध्या संपली आहे. जेव्हा व्याजदर कमी होत नाहीत, तेव्हा गुंतवणूकदार सोन्यासारख्या सुरक्षित गुंतवणुकीच्या पर्यायांऐवजी डॉलरमध्ये गुंतवणूक करतात.
डॉलर मजबूत झाल्यावर, इतर देशांमधील गुंतवणूकदारांसाठी सोने महाग झाले आहे. ज्यामुळे मागणी कमी होते आणि किंमती घसरतात.
डॉलर निर्देशांक सध्या १००.०५ वर पोहोचला आहे, जो तीन महिन्यांचा उच्चांक आहे. परिणामी, आंतरराष्ट्रीय बाजारात सोने सुमारे ३,९५०-४,००० डॉलर प्रति औंसच्या या टप्प्यात अडकले आहे.
भारतात काय परिस्थिती?
देशांतर्गत वायदे बाजारात, म्हणजेच MCX वर सोन्याचा भाव ₹१,२०,८९४ प्रति १० ग्रॅम आहे. सोमवारच्या तुलनेत ०.४२ टक्क्यांनी कमी आहे. चांदीचा दर देखील १,४७,०५० रुपये प्रति किलो (-०.४८%) पर्यंत घसरला आहे.
'सीएनबीसी आवाज'वर तज्ज्ञांनी सांगितले की, १,२०,४०० रुपयांच्या आसपास सोने खरेदी करणे योग्य ठरेल. ज्याचे लक्ष्य १,२२,००० रुपये आणि स्टॉप लॉस १,१९,३५० रुपये आहे. सोन्याच्या व्यापारासाठी हे लक्ष्य आहेत. जर तुम्ही घरगुती वापरासाठी सोने खरेदी करण्याचा विचार करत असाल तर तुम्ही ते करू शकता. त्याशिवाय, येत्या काळात सोने आणखी स्वस्त होऊ शकते असा अंदाजही तज्ज्ञांनी वर्तवला.
रिलायन्स सिक्युरिटीजचे जिगर त्रिवेदी यांनी सांगितले की, सोने थोड्या काळासाठी १,२०,५०० रुपयांपर्यंत घसरू शकते, परंतु १,२१,४०० रुपयांवर रेझिस्टन्स आहे.
जागतिक संकेत काय?
अमेरिका आणि चीनमधील तणाव कमी झाल्यामुळे सुरक्षित गुंतवणुकीची मागणी कमी झाली आहे. ४ टक्क्यांपेक्षा जास्त असलेल्या बाँड उत्पन्नामुळे सोन्यावर दबाव येत आहे. मात्र, मध्यवर्ती बँकांकडून सोने खरेदी सुरूच आहे आणि भू-राजकीय अनिश्चितता काही आधार देत आहे.
जर तुम्ही लग्न किंवा गुंतवणुकीसाठी सोने खरेदी करण्याचा विचार करत असाल, तर खरेदी करण्याची ही संधी आहे. मात्र, दीर्घकालीन गुंतवणूकदारांनी (१-२ वर्षे) बाजारात घाई करणे टाळावे. किंमती चढ-उतार होण्याचा अंदाज वर्तवण्यात आला आहे. सोन्याचा दर सध्या १,१९,८०० रुपये ते १,२२,७०० रुपयांच्या दरम्यान राहील.
चांदीची स्थिती काय?
चांदीला १,४७,००० रुपये ते १,४५,५०० रुपयांपर्यंत आधार आहे आणि १,५०,००० रुपये ते १,५१,५०० रुपयांपर्यंत रेझिस्टन्स आहे. तज्ज्ञांचे म्हणणे आहे की ₹१,४६,००० च्या आसपास चांदी खरेदी करणे फायदेशीर ठरेल.
एकूण काय?
सध्या सोने थोडे स्वस्त झाले आहे, परंतु ही घसरण तात्पुरती असू शकते याकडेही तज्ज्ञांनी लक्ष वेधले आहे. जर डॉलर कमकुवत झाला किंवा फेडने नरमाईची भूमिका स्वीकारली तर सोन्याच्या दरात पुन्हा वाढ होऊ शकते. त्यामुळे आंतरराष्ट्रीय पातळीवरील घडामोडींमध्ये मोठा उलटफेर झाल्यास त्याचा परिणाम सोन्याच्या दरावरही होण्याची दाट शक्यता आहे.
(Disclaimer: ही बातमी वाचकांच्या माहितीसाठी आहे. कोणतीही गुंतवणूक करण्याआधी आर्थिक सल्लागारांचा सल्ला घ्यावा.)