मुंबई: दिग्गज गुंतवणूकदार रेखा झुनझुनवाला यांनी टाटा समूहातील प्रसिद्ध कंपनी टायटनमध्ये आपली हिस्सेदारी आणखी वाढवली आहे. आर्थिक वर्ष 2025-26 च्या दुसऱ्या तिमाहीत त्यांनी कंपनीचे तब्बल 15 लाख नवे शेअर्स खरेदी केले असून त्यामुळे टायटनमधील त्यांचा एकूण हिस्सा आता 5.3 टक्क्यांवर पोहोचला आहे. या नव्या गुंतवणुकीनंतर त्यांच्या टायटनमधील हिस्सेदारीची एकूण किंमत सुमारे 17,000 कोटी रुपयांवर गेली आहे.
advertisement
बीएसईला दिलेल्या फाइलिंगनुसार सध्या रेखा झुनझुनवाला यांच्या नावावर टायटनचे 4.7 कोटी शेअर्स आहेत. त्यांचे पती आणि दिवंगत राकेश झुनझुनवाला यांचा टायटनसोबतचा प्रवास जवळपास दोन दशकांपूर्वी म्हणजे 2002-03 मध्ये सुरू झाला होता. त्या काळात टायटन आर्थिक अडचणीत होता आणि त्याचे शेअर्स फक्त दोन अंकी भावात व्यवहारात होते. अशा वेळी झुनझुनवाला दाम्पत्याने कंपनीवर विश्वास दाखवत गुंतवणूक केली. काही कोटी रुपयांची ती गुंतवणूक कालांतराने सुवर्णमूल्य ठरली आणि टायटनने त्यांना भारतातील सर्वात यशस्वी गुंतवणूकदारांपैकी एक बनवले. आज टायटन हा झुनझुनवाला कुटुंबाच्या पोर्टफोलिओचा कणा मानला जातो. काही आठवडे आधी कंपनीच्या शेअर्समध्ये 5 टक्क्यांची वाढ झाल्यानेच रेखा झुनझुनवाला यांच्या संपत्तीत 739 कोटी रुपयांची वाढ झाली होती.
टायटनच्या व्यवसायात गेल्या काही वर्षांत झपाट्याने वाढ झाली आहे. नुकत्याच जाहीर झालेल्या तिमाही निकालांमध्ये कंपनीने दमदार कामगिरी केली असून देशांतर्गत व्यवसायात 18 टक्के वाढ झाली आहे, तर आंतरराष्ट्रीय व्यवसायात तब्बल 86 टक्क्यांची झेप घेतली आहे. कंपनीने अलीकडेच अमेरिकेच्या व्हर्जिनिया राज्यात आपले नवे तनिष्क स्टोअर सुरू केले आहे. ज्वेलरी विभागात 19 टक्क्यांची वाढ झाली असून कॅरटलॅन या उपकंपनीने 30 टक्क्यांची वाढ नोंदवली आहे. त्याचबरोबर कंपनीने 34 नवी ज्वेलरी स्टोअर्स, 15 घड्याळांचे शोरूम आणि 5 आयवेअर आउटलेट्स सुरू केले आहेत. तिचे इतर ब्रँड्स फास्ट्रॅक, स्किन, तनेइरा आणि इर्थ यांनी मिळून 37 टक्क्यांची एकत्रित वाढ केली आहे.
शुक्रवारी टायटनचा शेअर एनएसईवर 3,718 रुपयांवर बंद झाला. जो मागील दिवशीपेक्षा 1.44 टक्क्यांनी कमी होता. तरीही गेल्या पाच वर्षांत या शेअरने 200 टक्क्यांहून अधिक परतावा दिला आहे आणि तो भारतातील सर्वाधिक विश्वासार्ह मल्टीबॅगर स्टॉक्सपैकी एक मानला जातो. झुनझुनवाला कुटुंबाचे टाटा समूहाशी अतूट नाते आहे. ते इंडियन हॉटेल्स, टाटा कम्युनिकेशन्स आणि टाटा मोटर्स पॅसेंजर व्हेइकल्समध्येही हिस्सेदार आहेत.
याशिवाय रेखा झुनझुनवाला यांची अप्टेकमध्ये 40 टक्के, फेडरल बँकेत 2.4 टक्के आणि कॅनरा बँकेत 1.6 टक्क्यांची हिस्सेदारी आहे. त्यांच्या या नव्या गुंतवणुकीमुळे पुन्हा एकदा स्पष्ट झाले आहे की टाटा समूहावरील झुनझुनवाला कुटुंबाचा विश्वास आजही तितकाच अढळ आहे. आणि दीर्घकालीन गुंतवणुकीवर त्यांचा विश्वास कायम राहणार आहे.