TRENDING:
ब्रेंट क्रूडमध्ये १६ टक्क्यांची घसरण
सलग अनेक दिवस शंभरी पार गेलेल्या कच्च्या तेलाचा दर आता १०० डॉलरच्या खाली आला आहे. युद्धविरामाच्या बातमीने जागतिक तेल बाजारात मोठी खळबळ उडाली. ब्लूमबर्गच्या अहवालानुसार, ब्रेंट क्रूडचे दर तब्बल १६ टक्क्यांनी घसरून ९२ डॉलर प्रति बॅरलवर आले आहेत. तर अमेरिकन क्रूड मध्ये गेल्या सहा वर्षांतील सर्वात मोठी घसरण झाली असून तो ९५ डॉलरवर स्थिरावला आहे. अमेरिकेचे राष्ट्राध्यक्ष डोनाल्ड ट्रम्प यांनी स्पष्ट केलंय की, "हा युद्धविराम पूर्णपणे इराण 'होर्मुज' मार्ग कसा आणि किती लवकर उघडतो, यावर अवलंबून असेल."
advertisement
युद्धविरामासाठी पाकिस्तानकडून मध्यस्ती
इराणचे परराष्ट्र मंत्री अब्बास अराकची यांनी दिलेल्या माहितीनुसार, पाकिस्तानने मांडलेला युद्धविरामाचा प्रस्ताव दोन्ही देशांनी मान्य केला आहे. या अंतर्गत पुढील दोन आठवडे समुद्री मार्ग सुरक्षित ठेवला जाईल. विशेष म्हणजे, या प्रस्तावाला इस्रायलनेही संमती दिली आहे, ज्यामुळे जागतिक बाजाराने सुटकेचा निःश्वास सोडला आहे.
होर्मुज मार्ग का महत्त्वाचा?
जगातील एकूण तेल आणि नैसर्गिक वायूच्या पुरवठ्यापैकी २०% पुरवठा हा एकट्या 'स्ट्रॅट ऑफ होर्मुज' मधून होतो. इराणने हा मार्ग बंद केल्यामुळे ऊर्जा बाजारात हाहाकार माजला होता. आता हा मार्ग मोकळा झाल्याने पुरवठा साखळी पुन्हा रुळावर येण्याची आशा आहे.
भाव जरी घसरले तरी रिस्क कायम!
तेलाचे दर कमी झाले असले तरी संकट पूर्णपणे टळलेलं नाही. कमोडिटी एक्सपर्ट रॉबर्ट रेनी यांच्या मते, "पुरवठा लगेच सामान्य होणार नाही. बंद पडलेले तेल विहिरी सुरू करणे आणि जहाजांची पुन्हा तैनाती करणे यासाठी किमान काही महिन्यांचा काळ लागू शकतो." त्यामुळे बाजारात अजूनही काही प्रमाणात अस्थिरता राहण्याची शक्यता आहे.