Akola News: 'मी कशाला आरशात पाहू ग..'; अकोल्यात चक्क बकऱ्यांचा नटून-थटून रॅम्प वॉक, पाहा खास Photos

अकोल्यातील अकोट येथे बकऱ्या सजून धजून ठुमकत ठुमकत रॅम्प वॉक करत होत्या. हे पाहून लोकांच्या ओठी एकच प्रतिक्रिया सहज उमटत होती, 'काय मस्त सजवल्या बकऱ्या !'..'काय सुंदर दिसतायेत हो बकऱ्या'...'

शेतात आणि रस्त्यावर दिसणाऱ्या ह्या बकऱ्यांचा हा 'रॅम्प वॉक' बघा...नटून-थटून, आलेले हे 'मॉडेल्स बकऱ्या'. याआधी अकोट येथे गाय, म्हैस, बैल, कुत्रा, ऑटो, बैल-गाडी, ट्रॅक्टर अशा कृषी संस्कृतीशी नाते जोडलेल्या घटकांचे 'फॅशन शो' आयोजित केले गेले आहेत.

आता ' बकऱ्यांचा फॅशन शो' त्यांच्या याच वेगळेपणाची जाणीव करून देणारा आहे.. पारंपारिक शेतीसोबतच शेतकरी जोडधंदा म्हणून बकऱ्यांचं पालन करतात, या बकऱ्यांचं दूध औषधी गुणधर्माच आहे. शेतकरी वर्षभर आपलं शेत-शिवार फुलविण्यासाठी राब-राब राबत असतो. मात्र एखादावेळी शेतीत नुकसान झालं तर हीच बकरी त्याच्या उपयोगी ठरते

बकरी शेतकऱ्यांना आर्थिकदृष्ट्या सक्षम आणि सुबत्ता प्राप्त करून देणारी असते. म्हणूनच हा आगळा-वेगळा फैशन शो म्हणजे बकऱ्यांच्या समर्पणाला केलेला सलाम असल्याची भावना शेतकऱ्यांमध्ये आहे.

महानगरातील कॉर्पोरेट क्षेत्रातील लोकांच्या संस्कृतीचं दर्शन घडवणारा उत्सव म्हणजे फॅशन शो. संगीत, झगमगाट, रॅम्प वर चालणाऱ्या सुंदर मॉडेल्स असं सर्व काही या फॅशन शोमध्ये पाहायला मिळत असतं.

पण, अकोट येथील 'फॅशन शो' मध्ये 'फॅशन'सोबतच कृषी संस्कृतीचं महत्त्व सांगण्यात आलं. याच 'शो'मधून अनेक सामाजिक संदेश देत आपली सामाजिक बांधिलकी अन् सामाजिक ऋण फेडण्याचा प्रयत्नही करण्यात आला.

'शो'मध्ये बकरीच्या दुधाचे महत्त्व, बकरीपासून बरे होणारे आजार, बकरीपासून होणारे फायदे, यासोबतच इतर सामाजिक संदेश देण्यात आलेत.