RBI चा डबल गेम! रेपो रेट घटताच तुमचा EMI तर कमी झाला, पण FD चे व्याजदरही घसरणार?

आरबीआयने ५ डिसेंबर रोजी रेपो रेटमध्ये ०.२५ टक्क्यांची कपात करून तो ५.२५ टक्क्यांवर आणला. या निर्णयामुळे कर्जदारांना दिलासा मिळाला असला तरी, अनेक गुंतवणूकदार आणि ज्येष्ठ नागरिकांच्या मनात एकच प्रश्न आहे: याचा परिणाम आमच्या बँक मुदत ठेवीवर होईल का? तज्ज्ञांच्या मते, रेपो रेटमधील कपातीचा परिणाम तातडीने एफडीच्या व्याजदरांवर होणार नाही.

बँक बाजारचे सीईओ आदिल शेट्टी यांच्या म्हणण्यानुसार, आरबीआयने व्याजदरात कपात करण्याची सुरुवात फेब्रुवारीमध्ये झाली, तेव्हापासूनच बँकांनी एफडीच्या व्याजदरात मोठी घट केली आहे. गेल्या काही महिन्यांत बँकांनी वेगवेगळ्या कालावधीच्या एफडीचे व्याजदर कमी केले आहेत. विशेषतः दोन वर्षांच्या एफडीच्या दरांमध्ये सर्वाधिक बदल झाला आहे

काही विशिष्ट कालावधीच्या एफडीवरच आकर्षक परतावा मिळत आहे. फेब्रुवारीपासून आतापर्यंत एफडीचे व्याजदर अर्ध्या टक्क्यापासून ते १ टक्क्यांपर्यंत खाली आले आहेत. स्टेट बँक ऑफ इंडिया आणि एचडीएफसी बँक यांसारख्या मोठ्या बँकांमध्येही व्याजदरात लक्षणीय घट झाली आहे. Stable Money चे सह-संस्थापक आणि सीईओ सौरभ जैन यांच्या माहितीनुसार, एसबीआयच्या 'अमृतवृष्टी' योजनेतील नियमित ठेवीदारांसाठी व्याजदर ७.१ टक्क्यांवरून घसरून ६.६ टक्क्यांवर आला आहे.

एचडीएफसी बँकेचा सर्वाधिक व्याजदरही ७.१ टक्क्यांवरून ६.६ टक्क्यांवर पोहोचला आहे. अनेक मध्यम आकाराच्या आणि स्मॉल फायनान्स बँकांनी तर काही एफडीवरचे व्याजदर १.५ ते २.२५ टक्क्यांपर्यंत कमी केले आहेत. तज्ज्ञांच्या मते, एफडीचे व्याजदर केवळ रेपो रेटमधील बदलामुळेच कमी होत नाहीत.

आरबीआयने ५ डिसेंबर रोजी व्याजदर कमी केल्याने अर्थव्यवस्थेच्या वाढीला प्रोत्साहन मिळेल, अशी अपेक्षा आहे, पण गुंतवणूकदारांना मात्र आता एफडीवरील परताव्यातील बदलाच्या वातावरणात आपली गुंतवणूक योजना बदलावी लागणार आहे. एफडीच्या कमी होणाऱ्या व्याजदरांचा धोका लक्षात घेता, गुंतवणूकदार आपल्या गुंतवणुकीचे नियोजन बदलू शकतात. एफडीवर व्याजदर कमी होण्याचा फटका कमी बसावा यासाठी, गुंतवणूकदारांनी आपले पैसे वेगवेगळ्या कालावधीच्या एफडीमध्ये विभागून ठेवण्याचा विचार करावा.

यामुळे लिक्विडिटीची अडचण येणार नाही आणि व्याजदर कमी होण्याचे नुकसानही मर्यादित राहील. ज्येष्ठ नागरिक ०.५० टक्के अधिक व्याज मिळत असल्याने दीर्घकाळासाठी एफडीमध्ये गुंतवणूक करू शकतात. कॉर्पोरेट एफडी, डेट म्युच्युअल फंड्स आणि सरकारी रोख्यांसारखे एफडीचे पर्याय शोधण्याचा सल्लाही तज्ज्ञांनी दिला आहे.