शेअर मार्केटमध्ये भूकंप, सेन्सेक्स-निफ्टी कोसळले, पैसे काढावे की ठेवावे?

शेअर मार्केटमध्ये सलग दुसऱ्या दिवशी मोठा भूकंप आला. सलग दुसऱ्या दिवशी 1000 अंकानी सेन्सेक्स कोसळलं, निफ्टी 24 हजारांच्या खाली आहे. त्यामुळे गुंतवणूकदारांचं टेन्शन वाढलं आहे. पैसे काढावेत की होल्ड करावेत असा प्रश्नही पडला आहे.

दुसऱ्या दिवशीही बाजारात विक्रीचा दबाव दिसून येत आहे. निफ्टी जवळपास 240 अंकांनी घसरून 24000 च्या जवळ पोहोचला आहे. एनबीएफसीच्या शेअर्सवर सर्वाधिक दबाव दिसून आला. सध्या तुम्ही पैसे काढू नका, होल्ड करा असा सल्ला तज्ज्ञांनी दिला आहे.

निफ्टी वित्त निर्देशांक जवळपास एक टक्का घसरला आहे. श्रीराम फायनान्स फ्युचर्समध्ये तीन टक्क्यांहून अधिक घसरण पाहायला मिळाली. एल अँड टी फायनान्स देखील 2% पेक्षा जास्त घसरले आहेत. सेन्सेक्स 1000 अंकांनी घसरून 80800 वर व्यवहार करत आहे. तर, निफ्टी 277 अंकांनी घसरून 24390 वर आला आहे. गुंतवणूकदारांचं टेन्शन वाढलं आहे. याशिवाय US फेडच्या निर्णयाकडेही सर्वांचं लक्ष लागलं आहे.

विदेशी भांडवलाचा ओघ आणि देशांतर्गत शेअर बाजारातील कमजोरी यामुळे मंगळवारी सुरुवातीच्या व्यापारात रुपया एक पैशांनी घसरून 84.92 प्रति डॉलर या सार्वकालिक नीचांकी पातळीवर आला. आयातदार आणि विदेशी बँकांकडून डॉलरच्या मागणीमुळे रुपया दबावाखाली राहण्याची शक्यता आहे, असे फॉरेक्स व्यापाऱ्यांनी सांगितले.

सोमवारी रुपया 11 पैशांनी घसरून 84.91 प्रति डॉलर या सर्वकालीन नीचांकी पातळीवर बंद झाला. दरम्यान, सहा प्रमुख चलनांच्या तुलनेत अमेरिकन डॉलरची स्थिती मोजणारा डॉलर निर्देशांक 0.02 टक्क्यांनी घसरून 106.83 वर आला.

आज शेअर बाजाराची सुरुवात कमजोर झाली. बॉम्बे स्टॉक एक्सचेंजचा 30 शेअर्सचा बेंचमार्क निर्देशांक 236 अंकांच्या घसरणीसह 81511 च्या पातळीवर उघडला. तर, नॅशनल स्टॉक एक्सचेंजच्या मुख्य संवेदनशील निर्देशांक निफ्टीने मंगळवारी 83 अंकांच्या घसरणीसह 24584 च्या पातळीवर व्यवहार सुरू केला.

शेअर मार्केटमध्ये पैसे गुंतवणं जोखमीचं आहे. त्यामुळे कोणतीही गुंतवणूक करण्याआधी तज्ज्ञांचा सल्ला घ्या. इथे दिलेली माहिती ही सामान्य माहिती ब्रोकरेज फर्मचं मत आहे. न्यूज 18 मराठी कोणत्याही फायद्या तोट्यासाठी जबाबदार राहणार नाही.