कार रस्त्यात अचानक थांबल्यानं पुण्यात 2 बसची धडक, विचित्र अपघातानंतर प्रवाशांनी खाली उतरून चालकाला चोपलं

पुण्यातील वर्दळीच्या गांजवे चौकात कार चालकाच्या निष्काळजीपणामुळे दोन मिनी बसचा विचित्र अपघात झाल्याची घटना घडली आहे.

कार चालकाने भररस्त्यात अचानक ब्रेक दाबल्याने पाठीमागून येणाऱ्या दोन बस एकमेकांवर आदळल्या. या अपघातात बसमधील प्रवासी जखमी झाल्याने संतप्त झालेल्या प्रवाशांनी कार चालकाला रस्त्यावरच चोप दिला.

गांजवे चौकातून जात असताना एका कार चालकाने कोणतेही संकेत न देता अचानक आपली गाडी थांबवली. यामुळे कारच्या अगदी पाठीमागे असलेल्या मिनी बसच्या चालकाने जोरात ब्रेक लावला

या बसच्या मागे असलेल्या दुसऱ्या मिनी बस चालकाला वेळ न मिळाल्याने त्याची बस समोरच्या बसवर जोरात आदळली. ही धडक इतकी भीषण होती की दोन्ही बसचे मोठ्या प्रमाणावर नुकसान झाले आहे.

अपघातात बसमधील काही प्रवाशांना दुखापत झाली, तर अनेक जण मोठ्या धक्क्याने घाबरले. अपघाताला कार कारणीभूत असल्याचे लक्षात येताच, बसमधील प्रवाशांनी खाली उतरून कार चालकाला जाब विचारला

वादाचे रूपांतर बाचाबाचीत झाले आणि संतापलेल्या प्रवाशांनी कार चालकाला रस्त्यावरच मारहाण करण्यास सुरुवात केली.

या अपघातामुळे आणि त्यानंतर झालेल्या राड्यामुळे गांजवे चौकात बघ्यांची मोठी गर्दी जमली होती. यामुळे या परिसरातील वाहतूक काही काळ ठप्प झाली होती.