IND vs PAK : भरवसा ठेवला त्यानेच दगा दिला... टीम इंडियाच्या ओपनरचा नेहरापेक्षा वाईट विक्रम!

मॅचची पहिलीच ओव्हर टाकण्यासाठी कर्णधार सलमान आघा स्वत: आला आणि त्याने ओव्हरच्या शेवटच्या बॉलला अभिषेक शर्माची विकेट घेतली. 4 बॉलमध्ये शून्य रन करून अभिषेक आऊट झाला.

पाकिस्तानविरुद्धच्या सामन्यात अभिषेक भारताचं ट्रम्प कार्ड ठरेल, असं वाटत होतं, कारण आशिया कपमध्ये अभिषेक शर्माने पाकिस्तानच्या बॉलिंगवर आक्रमण केलं होतं, पण यंदा मात्र अभिषेक अपयशी ठरला आहे.

अभिषेक शर्माचा हा फॉर्म टीम इंडियाची चिंता वाढवणारा आहे, कारण टी-20 वर्ल्ड कपमध्ये अभिषेक दोन सामने खेळला आहे आणि दोन्ही सामन्यांमध्ये तो शून्यवरच आऊट झाला आहे. युएसएविरुद्धच्या सामन्यात अभिषेक पहिल्याच बॉलला शून्य रनवर आऊट झाला.

नामिबियाविरुद्धच्या सामन्याआधी अभिषेक शर्मा आजारी पडला, त्यामुळे खेळू शकला नाही. यानंतर पाकिस्तानविरुद्ध तो फिट होऊन टीममध्ये परतला पण त्याला एकही रन करता आली नाही.

अभिषेक शर्माचा हा पहिलाच टी-20 वर्ल्ड कप आहे आणि पहिल्या दोन्ही इनिंगमध्ये तो शून्य रनवर पॅव्हेलियनमध्ये परतला. याआधी आशिष नेहरा, इमरूल केस हे दोन्ही खेळाडू टी-20 वर्ल्ड कपमध्ये पहिल्या दोन्ही सामन्यात शून्य रनवर आऊट झाले होते. नेहरा आणि केस यांनी त्यांच्या टी-20 वर्ल्ड कप करिअरमध्ये एकही रन केली नाही.

मागच्या 6 टी-20 इनिंगमध्ये अभिषेक शर्मा हा 4 वेळा शून्य रनवर आऊट झाला आहे. 0, 68 नाबाद, 0, 30, 0 आणि 0 हे अभिषेक शर्माचे मागच्या 6 टी-20 आंतरराष्ट्रीय इनिंगमधले स्कोअर आहेत. टी-20 वर्ल्ड कप जिंकण्याचं स्वप्न बघणाऱ्या टीम इंडियासाठी अभिषेक शर्माचं फॉर्ममध्ये येणं गरजेचं झालं आहे.