T20 World Cup : वानखेडेवर जगाला दाखवून दिलं, इंग्लंडची धडधड वाढवणारे नेपाळचे 5 'बहादूर'!

इंग्लंडच्या 185 रनचा पाठलाग करण्यासाठी आलेली नेपाळची टीम शेवटच्या बॉलपर्यंत मॅचमध्ये होती. शेवटच्या ओव्हरमध्ये नेपाळला विजयासाठी 10 रनची गरज होती, पण सॅम करनने फक्त 5 रन दिले.

नेपाळचा खेळाडू लोकेश बाम शेवटच्या बॉलपर्यंत झुंज देत राहिला. लोकेश बामने 20 बॉलमध्ये नाबाद 39 रनची खेळी केली, ज्यात 4 फोर आणि 2 सिक्सचा समावेश होता. लोकेश बाम नेपाळला विजय मिळवून देत वर्ल्ड कपमध्ये मोठा उलटफेर करेल, असं वाटत होतं, पण नेपाळचा विजय थोडक्यात हुकला.

इंग्लंडने दिलेल्या 185 रनच्या आव्हानाचा पाठलाग करायला आलेला नेपाळचा ओपनर कुशल भुरटेलने सुरूवातीपासूनच इंग्लंडच्या बॉलिंगवर आक्रमण केलं. भुरटेलने 17 बॉलमध्ये 29 रन करून नेपाळला जलद सुरूवात करून दिली.

नेपाळचा कर्णधार रोहित पौडेलने 34 बॉलमध्ये 2 फोर आणि 2 सिक्सच्या मदतीने 39 रन केले. तिसऱ्या क्रमांकावर बॅटिंगला आलेल्या पौडेलने दीपेंद्र सिंग ऐरेच्या मदतीने नेपाळची पडझड रोखली.

दीपेंद्र सिंग ऐरेने 29 बॉलमध्ये 44 रन केले, ज्यात 6 फोर आणि एका सिक्सचा समावेश होता. याशिवाय दीपेंद्रने बॉलिंगमध्येही चमक दाखवली, त्याने 3 ओव्हरमध्ये 25 रन देऊन 2 विकेट घेतल्या.

इंग्लंडची टीम एकवेळ 200 रनच्या पुढे जाईल असं वाटत होतं, पण नंदन यादवने इंग्लंडला 184 वर रोखलं. नंदनने 3 ओव्हरमध्ये 25 रन देऊन 2 विकेट घेतल्या.