जेव्हा कॅप्टन कूल त्याच्या मूळगावी जातो तेव्हा...20 वर्षांनी गावकऱ्यांच्या डोळ्यात आनंदाश्रू

धोनी हा खेळाडू म्हणून लय भारी आहेच, मात्र त्याचं साधं राहणीमान लोकांना प्रचंड आवडतं. अशात जेव्हा 20 वर्षांनी तो त्याच्या मूळगावी आला असेल तेव्हा गावकऱ्यांची अवस्था काय झाली असेल, याचा विचार त्याचे चाहते म्हणून आपण करूच शकतो.

उत्तराखंडच्या अल्मोडा भागातील ल्वाली हे धोनीचं मूळगाव आहे. त्याचे वडील पान सिंह धोनी यांनी जवळपास 45 वर्षांपूर्वी इथून झारखंडची राजधानी असलेल्या रांचीमध्ये स्थलांतर केलं होतं. त्यामुळे धोनी लहानाचा मोठा तिथेच झाला. परंतु म्हणतात ना की, माणूस कुठेही राहिला तरी त्याची नाळ आपल्या मूळ मातीशी जोडलेली असते.

ल्वालीमध्ये आजही धोनीचे काही नातेवाईक राहतात. त्यांना भेटायला तो 2003 साली याठिकाणी आला होता. तेव्हापासून गावकरी त्याच्या वाटेकडे डोळे लावून बसले होते.

तब्बल 20 वर्षांनंतर धोनी आपली पत्नी साक्षी आणि काही मित्रांसह बुधवारी मूळगावात दाखल झाला. त्याला पाहून गावकरी आश्चर्यचकीत झाले. लहान मुलांपासून वृद्ध व्यक्तींपर्यंत कोणाच्याच आनंदाला काही पारावर उरला नव्हता. त्यांनी पारंपरिक पद्धतीने त्याचं स्वागत केलं. धोनीनेही सर्वांची आपुलकीने विचारपूस केली. तिथल्या लोकांशी अगदी त्यांच्यातला एक होऊन तो बोलत होता.

बुधवारी सकाळी साधारण 10:30 वाजताच्या सुमारास धोनी गावात पोहोचला. त्यानंतर सगळ्यांना भेटून, सगळ्यांसोबत फोटो काढून कुलदेवतेचं दर्शन घेऊन दुपारी 1:30 वाजता तिथून निघाला. तेव्हा गावकऱ्यांनी त्याच्याकडे पुन्हा नक्की ये, अशी हक्काची मागणी केली. दरम्यान, धोनीमुळे गावात एखाद्या सोहळ्यासारखं वातावरण निर्माण झालं होतं.