'पुजारी' पुण्यातील मंदिरात आला; देवाला हात जोडले अन् मग तिथेच नको ते कांड, पण एक चूक अन् 48 तासात झाला 'गेम'

काय घडली घटना?

चिंचवड येथील भगवान श्री आदेश्वर शंकेश्वर पार्श्वनाथ जैन मंदिरात ही घटना घडली. आरोपी नरेश जैन याने चोरी करण्यासाठी एक भन्नाट शक्कल लढवली. तो पुजाऱ्याचा पेहराव करून मंदिरात दाखल झाला. कोणालाही संशय येऊ नये म्हणून त्याने सर्वात आधी देवाचे दर्शन घेतले, हात जोडले आणि संधी मिळताच देवाच्या डोक्यावरील २.५ लाख रुपये किमतीचा चांदीचा मुकूट शिताफीने चोरला. त्याने तो मुकूट एका कपड्यात झाकला आणि कोणालाही कळण्यापूर्वी तो मंदिरातून पसार झाला.

advertisement

सीसीटीव्हीने केला खेळ खल्लास

चोरटा मुकूट घेऊन पळून गेल्यावर आपल्याला कोणीही पाहिले नाही, अशा भ्रमात तो होता. मात्र, मंदिरातील सीसीटीव्ही कॅमेऱ्यांनी त्याची प्रत्येक हालचाल कैद केली होती. चोरीचा प्रकार लक्षात येताच मंदिर प्रशासनाने पोलिसांत धाव घेतली. पोलिसांनी सीसीटीव्ही फुटेज तपासले असता पुजाऱ्याच्या वेशातील चोरट्याचा चेहरा स्पष्ट दिसला.

गुन्हे शाखेने तांत्रिक तपासाच्या जोरावर अवघ्या ४८ तासांत नरेश जैनला ताब्यात घेतले. तपासात धक्कादायक माहिती समोर आली की, नरेश हा सराईत गुन्हेगार असून त्याच्यावर विविध पोलीस ठाण्यांत यापूर्वीच १२ गुन्हे दाखल आहेत. पोलिसांनी त्याच्याकडून चोरीचा चांदीचा मुकूट हस्तगत केला आहे.