वाहतुकीचा नियम मोडणं त्याला पडलं पावणेतीन लाखांना; पुणेकरांनो, 'ही' एक छोटी चूक पडतीये प्रचंड महागात

नेमकी घटना काय?

विश्रामबाग पोलिसांनी दिलेल्या माहितीनुसार, पीडित व्यक्तीच्या मोबाइलवर वाहतूक नियम मोडल्याबाबतची एक फाईल पाठवण्यात आली होती. ही फाईल आरटीओचे अधिकृत चलन असल्याचे भासवले गेले होते. तक्रारदाराने जशी ती फाईल उघडली, तसाच त्यांचा मोबाइल हॅक झाला. काही वेळातच चोरट्यांनी त्यांच्या बँक खात्यावर डल्ला मारत २ लाख ७५ हजार रुपये दुसऱ्या खात्यात वर्ग केले.

advertisement

आलिशान व्हिला, एका हॉलमध्ये बसलेले 3 तालुक्यातले 40 लोक; ते कांड पाहून पोलीसही चक्रावले, मुळशीत खळबळ

पुणे शहरात सध्या अशा प्रकारच्या 'मालवेअर' फाईल्स पाठवून फसवणूक करण्याचे प्रमाण वाढले आहे. केवळ वाहतूक चलनच नाही, तर थकीत वीज बिल, गॅस कनेक्शन कापले जाणे किंवा बँक केवायसी अपडेट करण्याच्या नावाखाली अशा फाईल्स किंवा लिंक्स पाठवल्या जातात. एकदा का तुम्ही ती फाईल डाऊनलोड केली की, तुमच्या मोबाइलचा ताबा चोरट्यांकडे जातो.

विश्रामबाग पोलीस ठाण्याचे पोलीस निरीक्षक अरुण घोडके या प्रकरणाचा तपास करत आहेत. पोलिसांनी पुणेकरांना आवाहन केले आहे की, अनोळखी क्रमांकावरून आलेल्या कोणत्याही फाईल्स उघडू नका. अधिकृत चलन भरण्यासाठी नेहमी सरकारी संकेतस्थळाचाच वापर करा. तुमची एक छोटीशी चूक तुमचे बँक खाते रिकामे करू शकते.