TRENDING:
नेमकी घटना काय?
लौकी गावचे रहिवासी असलेले किरण नवनाथ थोरात आणि त्यांचा मित्र पीयूष शंकर थोरात हे दोघे रात्रीच्या वेळी पल्सर दुचाकीवरून मंचर येथून आपल्या गावाकडे निघाले होते. चांडोली पार करून ते लौकी रस्त्यावरील पाण्याच्या टाकीजवळ पोहोचले. याचवेळी रस्त्याशेजारील उसाच्या दाट शेतात दबा धरून बसलेल्या बिबट्याने अचानक दुचाकीवर झडप घातली.
advertisement
बिबट्याने दुचाकीवर झडप घालताच किरण थोरात यांच्या हाताला आणि पाठीच्या डाव्या बाजूला बिबट्याच्या नख्या लागून गंभीर जखमा झाल्या. हल्ल्यामुळे दुचाकीचा तोल गेला होता, मात्र किरण यांनी मोठ्या धैर्याने गाडीवर नियंत्रण मिळवले आणि आरडाओरडा करण्यास सुरुवात केली. बिबट्या पुन्हा चाल करून येण्यापूर्वीच त्यांनी तिथून वेगाने दुचाकी पळवली. या थरारात पीयूष थोरात थोडक्यात बचावला.
मंचर उपजिल्हा रुग्णालयात उपचार
लौकी गावात पोहोचल्यानंतर या दोघांनी घडलेला थरार ग्रामस्थांना सांगितला. जखमी किरण थोरात यांना तातडीने मंचर उपजिल्हा रुग्णालयात दाखल करण्यात आले. घटनेची माहिती मिळताच वनरक्षक संपत तांदळे आणि वनसेवक जालिंदर थोरात यांनी घटनास्थळी भेट देऊन पाहणी केली.
उसाच्या शेतांमुळे या परिसरात बिबट्यांचा वावर वाढला असून, नागरिकांनी रात्रीच्या वेळी प्रवास करताना काळजी घेण्याचे आवाहन वनविभागाने केले आहे.