TRENDING:
कुठे साजरी केली जाते अनोखी होळी?
सिंधुदुर्ग जिल्हा हा त्याच्या निसर्गसौंदर्यासोबतच अंगावर शहारे आणणाऱ्या अद्भूत लोकपरंपरांसाठी ओळखला जातो. यातीलच एक सर्वात थरारक आणि अनोखी परंपरा म्हणजे सावंतवाडी तालुक्यातील कुणकेरी गावचा 'हुडोत्सव'. होळीच्या उत्सवात जिथे रंगांची उधळण होते, तिथे कुणकेरीमध्ये भक्ती आणि शक्तीचा एक वेगळाच खेळ पाहायला मिळतो. यंदा हा प्रसिद्ध हुडोत्सव 8 मार्च 2026 रोजी साजरा होणार असून, त्याची तयारी आता अंतिम टप्प्यात आली आहे.
advertisement
हुडोत्सव म्हणजे काय?
'हुडा' म्हणजे साधारणपणे 100 ते 125 फूट उंचीचा एक गगनचुंबी लाकडी खांब. हा हुडा शिलंगण किंवा चव्हाट्यावर उभा केला जातो. फाल्गुन पौर्णिमेपासून सुरू होणारा हा उत्सव सात दिवस चालतो. या उत्सवाचे मुख्य वैशिष्ट्य म्हणजे 'अवसार' म्हणजेच ज्यांच्या अंगात देवीचा संचार होतो अशा व्यक्ती, ज्या या उंच हुड्यावर चढतात आणि खाली हजारो भाविक उभे असतात आणि या उत्सवाचे साक्षीदार होतात.
हुडोत्सवातील थरार
पेटत्या शेणींचा मारा: होळीच्या सहाव्या दिवशी रात्री हुड्याभोवती आणि होळीवर पेटत्या शेणी मारल्या जातात. मशालींच्या प्रकाशात होणारा हा अग्नीखेळ पाहताना काळजाचा ठोका चुकतो.
हुड्यावर चढण्याचा क्षण: सातव्या दिवशी मुख्य उत्सव असतो. अंगात संचार आलेले श्री भावई देवीचे अवसार या 100 फुटी उंच हुड्यावर शेंड्यापर्यंत चढतात. इतक्या उंचीवर कोणतीही सुरक्षा नसताना हे अवसार लीलया चढून जातात.
या परंपरेमागील इतिहास आणि श्रद्धा
कुणकेरीचा हुडोत्सव हा केवळ करमणूक नसून ग्रामदैवत श्री सातेरी-भावई देवीच्या चरणी अर्पण केलेली भक्ती आहे. या उत्सवात शेजारच्या आंबेगावचा श्री देव क्षेत्रपाल आणि कोलगावचा श्री देव कलेश्वर हे देवीचे भाऊ मानले जातात. उत्सवाच्या दिवशी या देवांची रोंबाटे कुणकेरीच्या सीमेवर येतात आणि भावा-बहिणींची भेट घडते. उत्सवात 'वाघ' बनलेली माणसे आणि घोडेमोडणीचा खेळ हे देखील मोठे आकर्षण असते. लंडनहूनही काही भाविक केवळ या 'वाघाच्या खेळा'साठी दरवर्षी कुणकेरीला येतात. उंच हुड्यावर चढणे हे संकटांवर मात करून विजयाचे प्रतीक मानले जाते.
टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)