IPLमध्ये 20व्या ओव्हरचा थरार पुन्हा पाहायला मिळणार, धोनी खेळेल, नक्की खेळेल; CSK च्या सीईओंनी केलं शिक्कामोर्तब

पत्रकारांशी बोलताना विश्वनाथन यांना थेट प्रश्न विचारण्यात आला की, पुढील हंगामात धोनी खेळणार का? त्यावर त्यांनी ठाम शब्दांत उत्तर दिले, “तो खेळेल, नक्की खेळेल.” या एका वाक्याने सोशल मीडियावर सुरू असलेल्या निवृत्तीच्या चर्चांना ब्रेक लागला.

CSK आणि धोनी

एमएस धोनी आयपीएलच्या सुरुवातीपासून चेन्नई सुपर किंग्जसोबत जोडले गेले आहेत. त्यांच्या नेतृत्वाखाली CSK ने पाच वेळा आयपीएल ट्रॉफी जिंकली आहे. स्पर्धेच्या इतिहासातील संयुक्त सर्वाधिक विजेतेपद. ‘थाला’ म्हणून ओळखला जाणारा धोनी हा केवळ खेळाडू नाही, तर CSK च्या ओळखीचा केंद्रबिंदू आहे. IPL 2024 आधी धोनीने कर्णधारपद सोडून जबाबदारी ऋतुराज गायकवाडकडे सोपवली होती. त्यानंतर तो फक्त खेळाडू म्हणून संघात राहिला. त्यामुळे त्याच्या निवृत्तीबाबत तर्क-वितर्कांना उधाण आले होते.

advertisement

CSK चा खराब हंगाम, पण धोनीवर विश्वास कायम

गेल्या हंगामात चेन्नई सुपर किंग्जने इतिहासातील सर्वात निराशाजनक कामगिरी केली. 14 पैकी फक्त 4 सामने जिंकत संघ 10 संघांच्या गुणतालिकेत शेवटच्या स्थानावर राहिला. सलग दुसऱ्या वर्षी CSK प्लेऑफमध्ये पोहोचू शकला नाही. तरीही फ्रँचायझीने धोनीवरील विश्वास कायम ठेवला आहे. त्याची उपस्थिती संघासाठी केवळ मैदानापुरती मर्यादित नसून ड्रेसिंग रूममध्येही मोठी ताकद मानली जाते.

जडेजा राजस्थानकडे; सॅमसनची एन्ट्री

दरम्यान संघरचनेत मोठे बदल झाले आहेत. अनुभवी ऑलराऊंडर रवींद्र जडेजा आणि सॅम करन यांची राजस्थान रॉयल्सकडे देवाणघेवाण झाली आहे. जडेजासारख्या महत्त्वाच्या खेळाडूचा संघाला निरोप देणे ही मोठी घडामोड मानली जाते. त्याच वेळी चेन्नईने राजस्थान रॉयल्सकडून यष्टिरक्षक-फलंदाज संजू सॅमसनला आपल्या ताफ्यात सामील केले आहे. धोनीनंतरच्या काळाची तयारी CSK ने सुरू केली असल्याचे या निर्णयातून स्पष्ट संकेत मिळतात.

निवृत्ती कधी? उत्तर अजून धूसर

धोनी IPL 2026 मध्ये खेळणार हे निश्चित झाले असले, तरी त्याची अंतिम निवृत्ती कधी होईल, याचे उत्तर अजूनही अनुत्तरितच आहे. मात्र सध्या तरी CSK चाहत्यांना एकच दिलासा तो म्हणजे ‘थाला’ अजून मैदानात दिसणार आहे.