सचिनला वर्ल्ड चॅम्पियन बनवणाराच घेतोय टीम इंडियाची मजा, सापळा रचून काढला संजूचा काटा!

8 बॉलमध्ये 22 रन करून संजू माघारी परतला. डीप मिडविकेटला आणखी एक सिक्स मारायच्या नादात संजू कॅच देऊन बसला. संजूने भारताला आक्रमक सुरूवात करून दिली असली, तरी त्याला मोठा स्कोअर करता आला नाही. नामिबियाच्या टीमने संजूला सापळ्यामध्ये अडकवलं.

संजू सॅमसन आऊट झाल्यानंतर कॅमेरा नामिबियाच्या डगआउटकडे गेला, जिथे नामिबियाचे खेळाडू आणि कोच आनंदी दिसत होते. नामिबिया टीमचा मेंटर आणि सल्लागार गॅरी कर्स्टन यांच्या चेहऱ्यावरचं हसू तर अजिबात लपत नव्हतं.

advertisement

गॅरी कर्स्टन हे नाव भारतीय टीम आणि भारतीय क्रिकेट रसिकांना परिचित आहे. भारताला 2011 चा वनडे वर्ल्ड कप जिंकवून देणारे प्रशिक्षक गॅरी कर्स्टन हे सध्या नामिबियाच्या टीमचे मेंटर आहेत. नामिबियाच्या डगआऊटमधील चित्र पाहिल्यानंतर गॅरी कर्स्टन यांनीच संजूची विकेट घेण्यासाठी सापळा रचला होता आणि हा सापळा यशस्वी ठरला, असं वाटत होतं.

नामिबियाच्या ड्रेसिंग रूममधला आनंद फार काळ टिकला नाही, कारण त्यानंतर इशान किशनने नामिबियाच्या बॉलिंगवर आक्रमण केलं. इशानने 24 बॉलमध्ये 254.17 च्या स्ट्राईक रेटने 61 रनची खेळी केली, ज्यात 6 फोर आणि 5 सिक्सचा समावेश होता. तर हार्दिक पांड्याने 28 बॉल 52 रन केले, त्यामुळे टीम इंडियाचा स्कोअर 20 ओव्हरमध्ये 209/9 इतका झाला. या आव्हानाचा पाठलाग करताना नामिबियाचा 18.2 ओव्हरमध्ये 116 रनवर ऑलआऊट झाला. वरुण चक्रवर्तीने सर्वाधिक 3 विकेट घेतल्या, तर हार्दिक पांड्या आणि अक्षर पटेलला 2-2 विकेट घेण्यात यश आलं. अर्शदीप सिंग, शिवम दुबे आणि जसप्रीत बुमराह यांना 1-1 विकेट मिळाली.