TRENDING:
मुंबईमध्ये राहणारे चंद्रकांत चिले बदलापूरामध्ये एका कार्यक्रमासाठी आले होते. यावेळी त्यांना 4 भोंदू ज्योतिषी बाबांनी गाठून त्यांना आपल्या जाळ्यात ओढलं. तुमच्या घरावर कोणीतरी पिशाच्च सोडलंय, असं बोलून त्यांच्याकडून तब्बल 9 लाख 72 हजार रूपये रोख रक्कम आणि सोनं घेऊन फरार झाले आहेत. चारही भोंदूंना त्या वृद्धाला आपल्या जाळ्यात खेचण्यासाठी फार काही वेळ लागला नाही, काही वेळातच ते त्यांच्या जाळ्यात अडकले. गेल्या काही महिन्यांपूर्वी तुमच्या घरी एका व्यक्तीचा मृत्यू झाला होता, आता आणखीन एका व्यक्तीचा मृत्यू होईल, अशी भिती त्यांना दाखवली. हे सर्व थांबवण्यासाठी कामख्या देवीला पूजा करावी लागेल.
advertisement
सोबतच तुमच्या घरात चार सोन्याचे खिळे ठोकावे लागतील, असं सांगून त्या भोंदू ज्योतिषांनी वृद्ध व्यक्तीकडून 9 लाख 72 हजार रूपयाची रोख रक्कम आणि सोन्याचे दागिने घेतले. असा सर्व लाखोंचा मुद्देमाल घेऊन चार ज्योतिष तिथून पळाले. वृद्ध व्यक्तीला आपली फसवणूक झाल्याचे कळाले नाही, घटनेच्या काही दिवसांनंतर त्यांना आपली फसवणूक झाल्याचे कळाले. फसवणूक झाल्याचे कळताच चिले यांनी बदलापूर पूर्व पोलीस ठाण्यामध्ये धाव घेतली. धाव घेत घडलेली सर्व घटना त्यांनी पोलिसांना सांगितली असून पोलिसांनी तपासाची चक्रे फिरवले आणि आरोपींना ताब्यात घेतले. घटनेची सखोल चौकशी गुन्हे शाखेचे पोलीस निरीक्षक राकेश गज्जल यांच्याकडे सुपूर्द करण्यात आला.
बदलापूर पोलीसांकडून चारही भोंदू ज्योतिषांवर फसवणूक आणि महाराष्ट्र अंधश्रद्धा निर्मुलन कायदान्वये गुन्हा दाल करण्यात आला आहे. चिले यांची फसवणूक करणाऱ्या चार भोंदू ज्योतिषांची नावे देखील समोर आले आहेत. आरोपी ब्रह्मदत्त इंगळे, शिवलींग इंगळे, भवानी इंगळेसह अन्य एकाला पोलीसांनी ताब्यात घेतले आहे. बदलापूर पूर्व पोलीसांनी या चारही आरोपींना बदलापूरमध्येच बेड्या ठोकल्या आहेत.