TRENDING:
चिंचपाडा गावातील पवार नगर परिसरामध्ये तात्पुरते छप्पर असलेल्या आणि विटांचं बांधकाम केलेल्या 14 इमारतींवर, पूर्णपणे बांधलेल्या 14 घरांवर आणि दोन बेकायदेशीरपणे बांधलेल्या चाळींवर महापालिकेने बेधडक कारवाई केलेली आहे. महापालिका अधिकाऱ्यांनी दिलेल्या माहितीनुसार, बांधकामे आवश्यक परवानग्यांशिवाय आणि विकासाच्या नियमांचे उल्लंघन करून केल्यामुळे ही कारवाई करण्यात आलेली आहे. महापालिका आयुक्त अभिनव गोयल यांनी सर्व उपआयुक्तांना शहरातील रिकामी बेकायदेशीर बांधकामे पाडण्यास प्राधान्य देण्याचे निर्देश दिले आहेत.
advertisement
सोबतच, कमी किंमतीमध्ये बांधलेल्या आणि गृहनिर्माण योजनांचे आमिष दाखवून नागरिकांची फसवणूक करणाऱ्या भूमाफियांवर महाराष्ट्र प्रादेशिक आणि नगर नियोजन (एमआरटीपी) कायद्यांतर्गत कठोर कायदेशीर कारवाई करण्याचे निर्देशही त्यांनी अधिकाऱ्यांना दिले आहेत. महत्त्वाची बाब म्हणजे, कमी किंमतीचे अमिष दाखवून घर खरेदीदारांना लक्ष्य करणाऱ्या मोठ्या प्रमाणावरील अवैध बांधकाम रॅकेटमध्ये सामील असलेल्यांविरुद्ध महाराष्ट्र संघटित गुन्हेगारी नियंत्रण कायद्यासारख्या (MCOCA) कठोर कायद्यांचा वापर करण्याचे संकेत सुद्धा यावेळी देण्यात आलेले आहेत.
उपायुक्त चंद्रकांत जगताप, अतिक्रमण आणि अनधिकृत बांधकाम नियंत्रण विभागाचे अधीक्षक राजेंद्र साळुंखे यांच्या देखरेखीत ही तोडक कारवाई राबविण्यात आली. या कारवाईत महापालिकेचे अधिकारी, सात कर्मचारी, आठ पोलीस कर्मचारी, दहा कंत्राटी मजूर आणि दोन जेसीबी मशीन यांचा सहभाग होता. कारवाईदरम्यान, काही स्थानिक रहिवाशांनी आणि बाधित इमारतींच्या मालकांनी प्रतिकार करण्याचा प्रयत्न केला. पण, पोलीस बंदोबस्तामुळे परिस्थिती नियंत्रणात राहिली आणि कोणतीही अनुचित घटना न घडता मोहीम यशस्वीपणे पार पडली.
अनधिकृत बांधकामांवरील कारवाई सुरळीतपणे आणि कोणत्याही अडथळ्याशिवाय पार पडल्याची माहिती केडीएमसीच्या उपायुक्तांनी दिली. महापालिकेच्या या कठोर भूमिकेमुळे परिसरातील बेकायदेशीर बांधकामांना आळा बसेल अशी अपेक्षा सुद्धा उपायुक्तांनी व्यक्त केली आहे.